Noh ka trok shariat, hajan Rngain iap 2 ngut

Shillong, 09 Nohprah:
Mynta ka janmiet, ar ngut ki briew ki la khlad hashen haba kawei ka trok dumper (ML05P-2266) ka la noh sha riat ha kawei ka jaka kaba khot Khohiar kaba don hajan Rngain, ka surok Shillong-Dawki.
Katkum ka khubor na ki pulit ka Pynursla, la iathuh ba kane ka jingjia ka la jia ha ka por 5:30 baje janmiet ka la noh ha katei ka riat kaba don hajan lad Mawkhap bad ar ngut ki briew ki la khlad tangba ym pat tip kyrteng.
Ki pulit ka Pynursla kila ong ba kane ka trok ka wan kiew na thain Pynursla sha Shillong. Ki pulit haduh ba thoh ia kane ka khubor ki dang don sha katei ka jaka ban hiar ia ki riat ban leit wad ia ki briew bad tan ia ki met iap napoh riat ba jrong bha.
Ia ka daw ka jinghap, ym pat lah ban tip bad ki pulit ki dang pynlong ia ka jingwad tohkit halor kane ka jingjia.
Lah ban kdew ba ha u bnai ba la dep ruh, kawei ka trok kitmaw ka la noh shariat ha Rngain bad ar ngut ki briew ki la khlad hashen.