Shah kem 2 ngut, kiba thmu pyniap ia U SP South Garo Hills

Shillong, 8 Nohprah:
Mynta ka sngi ki pulit ki la ioh kem ia 2 ngut ki briew kiba la ngeit ba ki dei ki briew jong ka seng GNLA, kitei 2 ngut dei kijba la thmu ban pyniap ia u SP ka South Garo hills u Anand Mishra. U Boresh Sangma, 38 snem karta na ka shnong Bul Awe kaba don ha Baghmara bad u Rankhu Momin, 49 snem karta ba sah ha bolsal Ading kaba don ha Baghmara hi ki dei kitei ki 2 ngut kiba la shah kem mynta ka sngi.
Katkum ka jingiathuh ki pulit ki la ong ba kitei ar ngut ki la byrngem pyniap bun bunsien ia u SP ka SGH da kaba phah ia u da ka SMS bad ki la dawa pisa teng ruh T.50 lak tyngka na u bad ki la byrngem ba lada um siew kin pyniap ia u, ki la pyndonkam beit thik tang da uwei u nombar phone ban dawa pisa bad ban byrngem pyniap briew.
Ki phah ia kitei ki SMS ha u nombar shimet bad kumjuh ruh ha u nombar ophis jong u SP.
Hadien ka jingshah kem ki la phla sha ki pulit ba ki la don jingthmu ban pyniap ia u SP da kaba plan ban leit hiar thma ha ingsah jong u Kitei 2 ngut ki la phla ruh ba ki thmu pyniap ia u da kaba shu siat iap. Ha ka SMS ba ki phah la ong ba ki thoh da ka sih ka sang ban pyntieng ia utei u heh pulit.
U Mishra u la ong ba ka eh bha ia u ban wad ia kitei ki briew namarba hadien ba la dep phah ia ki jingthoh byrngem ki la sei noh ia ki simcard , hynrei u la ong ba dei na ka jingtrei shitom ka kynhun pulit kaba tohkit ia katei ka kam, la ioh kem noh ia ki.
U Mishra u la ong ba haduh mynta ym pat lah ban pynthikna la ki dei ne-em ki dkhot ka GNLA hynrei mynta ki dang iai phla ia ka kyrteng ki briew kiba ia plan ryngkat bad ki.
Ki pulit ki la ioh kurup ia ka simcard ba kitei ar ngut ki ju phah SMS bad kumjuh ruh ia ka mobile phone ba ki pyndonkam.