18 tylli ki jaka thep vote ba don jingma ha WKH

Shillong, 8 Nohprah:
U SP jong ka West Khasi Hills u bah S. Nongtynger u la ong ba ki don 18 tylli ki jaka thep vote ne ki Polling Station ha West Khasi hills kiba don jingma ha kane ka elekshon ha ki 3 tylli ki konstitwensi. Kitei ki 18 tylli ki jaka thep vote ki kynthup ia 8 tylli ha Mairang konstitwensi, 7 tylli ha Mawthadraishan bad 3 tylli ha Rambrai Jyrngam konstitwensi.
Na kitei ki 18 tylli la shim ba ha ki ar konstitwensi ki dei ki jaka ba la jngai na ki jaka ba kham long sor katba ha Rambrai Jyrngam pat la shim ba ki dei ki jaka kiba don ha khappud bad ka jylla Assam khamtam ha thaiñ Langpih. U SP u la ong ba ha baroh kitei ki 18 tylli ki jaka thep vote yn phah ia ki bor pahara ba khlaiñ kiba kit tiar siat bad ki bym kit tiar siat ruh katba ha kiwei pat ki jaka yn phah da ki pulit kiba khlem tiar ialeh.