Rakhe ia ka sngi kha u Bull ha Malki

Shillong,7 Nohprah:
La rakhe ia ka sngikha ba 22 jong u Bull N Lyngdoh mynta ka sngi ha Malki hakhmat u mot sahkynmaw ba la tei ia utei u rangbah uba ieng hajan ka Shillong Law College. La rakhe ia ka lyngkhuh sngi kha ba 22 jong utei u nongialam barim bad ba satar ka KSU da ka seng HYC ha ryngkat ka jingdonlang ki bahaing hasem jong u. La pynkynmaw shaphang ki jingim jong u Bull da u kni jong u –u bah M.S Lyngdoh, uba la pynkynmaw ruh ia ki jingshitom ba u Bull u la shah ha ki por ba u long u nongialam ki samla ban ia khih na bynta ka ri bad ka jaitbynriew.
Ka dei ka sien ba nyngkong ba ka HYC ka la sdang ban rakhe kynmaw ia ka sngi jong utei u nongialam barim ka KSU uba haduh mynta baroh ki ia tip ia ka kyrteng bad ka nam jong u kum u nongialam sengbhalang. Kiwei pat kiba la ai jingkren ki kynthup ia ki nongialam HYC u bah Robertjune Kharjahrin bad kiwei pat. Ha katei ka sngi ka HYC ka la pynlong ruh ia ka jingmareh marathon ia ki khynnah kynthei bad shynrang bad la ai ruh da ka sertiphiket bad khusnam sha ki nongjop.