Nongpoh, 07 Nohprah:
Da ka jingthmu ban kyntiew ia ka ioh ka kot ha ki thain nongkyndong bad khamtam eh ha ki thain khappud Meghalaya bad Assam, ha kaba mynta ka sngi ka Khasi Hills Autonomous District Council, ka la buh ia u Mawnongrim na ka bynta ban shna ia kawei ka Iew khappud ha ka shnong Pamsohbar, ba hapoh ka Hima Mylliem Syiemship, Ri Bhoi District.
Ia u Mawnongrim jong katei ka Iew khappud, la plie paidbah da u Bah P.N Syiem, CEM ka KHADC kum u kongsan, ha ryngkat ka jingdonlang ka Kong Rona Khymdeit MDC ka Nongpoh Constituency, u Bah Donkupar Sumer, MDC ka Umsning Constituency, u Bah Hadrian Lyngdoh EM ka Market, u Paiem Ricky Nelson Syiem, Syiem Hima Mylliem, u Bah Cleophas Thre Nongrum, Rangbah shnong ka Umdaprngi, u Bah Rayonald Kharkamni lem bad kiwei ki riew rangbah.
Ka jingurlong ban shna ia katei ka Iew ha katei ka shnong, ka la jia ruh hadien ba ka Market Committee jong katei ka shnong ha ryngkat ka jingiatreilang bad ka KHADC, ki la rai ban pynlong Iew ha katei ka jaka bad pynlong ruh kum kawei na ki Iew kaba khring ia ki nongwan thied wan pet da kaba die tang ia ki jingdie kiba khlem da pyndonkam dawai.
Ha kaba sdang eh, ia u Mawnongrim bad ka jingsdang ban pynlong Iew ha katei ka jaka, ka dei ruh lyngba ka MDC Scheme jong ka 13 Finance Commission ha ka jingmang pisa ba T.2 Lak, ia kaba la noh synniang da ka Kong Rona Khymdeit.
Haba kren kum u kongsan ha kane ka sngi, u Bah P.N Syiem, nyngkong eh u la ai ka jingiaroh sha ka MDC bad ki nongialam shnong, kiba la shimkhia bad don ruh ia kata ka jingthmu ban kyntiew ia ka ioh ka kot ha ki thain nonkyndong lyngba kane ka Iew Khappuud.
“Ngim lah ruh ban len ba ki shnong kiba don ha ki thain khappud ki dang sahdien ha kiba bun ki liang, khamtam eh haba iadei bad ka roi ka par, hynrei ka jingthmu ban plie ia kiba kum kine ki jait Iew, kan iarap ruh ban wanrah ia ka jingkylla ha ki shnong kiba don ha kane ka thain ba khappud bad ka Assam” ong u Bah P.N Syiem.
Kumta u la kyntu ruh ia ki paidbah ha katei ka thain ba kin iatrei ryngkat ryngkat bad ki nongpyniaid jong katei ka Iew, namar lada don ka jingiatreilang naduh ki paidbah, ki nongshong dukan ryngkat bad ka Market Committee, da kaba pynneh pynsah ia ka jinglong jingman hapoh jong ka Iew, lah ruh ban pynlong ia kane kum kawei na ki Iew kaba pawnam ym tang hapoh ka Distrik hynrei wat ha ka jylla ruh kumjuh, u la bynrap.
Ha kane ka sngi, la ioh ruh ia ka jingkren da ka Rona Khymdeit, u Bah Donkupar Sumer, u Bah Hadrian Lyngdoh, u Paiem Ricky Nelson Syiem lem bad kiwei ki riew rangbah.
Phi don ban ong eiei?