Jowai, 6 Nohprah:
Ka Election shiteng samoi sha iing dorbar ka JHADC na 1-War East ka la shit bha bad ka jingialap paidbah ki kyrtong kan kut ha ka 10 tarik bad ha ka jinghiar jurip jong u Rupang sha katei ka thain mynta ka sngi la sngewthuh ba ka jingiakhun ka long beit hapdeng u kyrtong ka Congress I u ma Lamdibok Sumer bad u kyrtong shimet, u ma Losingh Lakuna.
Ki don haduh saw ngut ki kyrtong ha katei ka Constituency, kiba kynthup ia u kyrtong ka BJP, u ma Smenlang Kyndait uba dei na ka shnong Skentalang, u ma Firstborn Manner (UDP) na ka shnong Tarangblang, u ma Lamdibok Summer (INC) uba dei ruh u CEM barim ka JHADC uba na ka juh ka shnong, Tarangblang bad u ma Losingh Lakuna (IND) naka shnong Syndai.
Ka lyer ha kane ka Constituency ka shit bha hadpeng u kyrtong Shimet, u ma Lakuna bad u kyrtong ka INC u ma Lamdibok Sumer.
Ka khubor na katei ka thain ka la iathuh ba u kyrtong shimet uba la ioh ia ka jingkyrshan ba radbah jong u MLA, u ma Stephan Mukhim u don ka jingkyrmen ban poi ha ka thong. Katba u ma Lamdibok Sumer ruh u don ka jingkyrmen, hynrei ka khubor ka ong ba ka pyntlot ia u ka long namar ba ki don ar ngut kiba na ka juh ka shnong.
“Ka shnong Tarangblang bad ka shnong Satpator (lane ka shnong Tarangblang pohshnong kumba la jutip ha kipor mynshwa) ka pait arliang na ka bynta ban ia sam ia ka jingdon ki nongthep vote kiba don haduh kumba 800 eiei. Katba u kyrtong shimet pat u la don lypa iaka stock kaba paka na ka shnong jong u ha Syndai. U kyrtong shimet na katei ka Constituency ula ioh ruh ka jingkyrshan na u MLA ka thain bad kane ka long ka kabu ksiar ia u ban poi sha ka thong namar ha katei ka Constituency naduh mynshwa, u kyrtong uba ioh ia ka jingkyrshan u ju poi sha ka thong.
“U ma BS Pohlong, bamkwai ha dwar u Blei u la jop namar ka jingkyrshan ki MLA, RL Tariang bad JD Pohrmen, u ma Lamdibok u la jop namar ka jingkyrshan jong u ma Lahkmen Rymbui ha ka por ba u ma Rymbui u long MLA bad mynta ka kynti, u ma Lakuna u la ioh ia ka jingkyrshan jong u ma Stephanson Mukhim, MLA ka thain bad ka don ka jingkyrmen ba utei u kyrtong shimet un poi thong lada ka lyer ka neh kumba long mynta”, la pynpaw ki riew peitngor ka thain.
Haba phai pat sha u kyrtong ka UDP, ki riew peit ngor ki la iathuh ba ha ka jingshisha u don ka jingkyrmen hynrei na ka daw ka jingshet kylla ki leader lane ki katto katne ngut ki nongkyrshan ba paw khmat, u la hap ban trei borbah ha kine ki sngi hashwa ka 10 tarik shwa ban kut ka jingialap paidbah.
Katba na ka liang u kyrtong ka BJP pat, ki paidbah ki ong ba kadei ka jingbakla jong ka party ban ai ia ka ticket sha u kyrtong.
Kumba ka long mynta ka jingiakhun hi ha katei ka Constituency ban ioh mihkhmat ia ki paidbah sha ka JHADC ka long beit hadpeng u kyrtong ka INC bad IND, la ong ka thyllong khubor.
Phi don ban ong eiei?