“Men ia leh bad nga, men bynda lut ki jingdon jingem jong me”

Nongstoiñ, 4 Nohprah:
U bah Wallambok Dkhar , Organising Secretary jong ka seng NPP West Khasi Hills uba dei u khun jong u bah H.L Nongsiang President ka NPP Mawshynrut Circle u la kynnoh ba u MLA ka HSPDP na Mawshynrut konstitwensi u bah Witting Mawsor u la kren tohmet ia u bad katei ka pynsngewsih kthang ia utei u samla. U la ong ba ha ka 2 tarik mynta u bnai u bah Witting u la leit sha dukan jong u (Wallambok) kaba don ha Nongstoiñ bad u la kylli shaphang ka jinglong jingman jong ka party NPP.
U la ong ba katei ka jingkylli bniah u bah Witting ia ka party NPP ka long kum ka jingiakren kai ia kren danda hynrei kynsan kynsan ha ka jingbym poi pyrkhat u la ong ba u bah Witting u kren tohmet ia u da kaba ong “Men ia leh bad nga, men bynda lut ia ki jingdon jingem jong me”.
Ka NPP ka la pynrem ia u bah Witting namar katei ka jingkren tohmet bad ka la kyntu ba um dei shuh ban mlien kum katei ka jait akor kaba pynpaw ba um pat long rangbah.
Ka khubor na Shillong: U nongthohkhubor u la ia kren sa bad u bah Witting Mawsor ban pynthikna ia katei ka jingshah kynnoh hynrei u bah Mawsor u la kyntait bad u ong ba ka dei tang ki nia danda haba ia kren paralok, “Dei tang ki nia danda, ki nia biria ba ngi shu ia kren paralok” u la ong.
U la iathuh ba ha katei ka sngi mar ia rung ha dukan u bah Wallam u ong ia u ‘Ei Garo Land’ bad u bah Wallambok ruh u la jubab lang u ong ‘Ei Khasi Land’ bad hangta ki la ia kren kai kren danda noh , “Ngi don ia bun bha ki paralok suda, ngi ia kren kai noh bad ia ka rkhie” u la ong.
U la iathuh ba u kpa jong u bah Wallam u bah H.L Nongsiang u dei uba la pynkhreh ban ia khun na Mawshynrut konstitwensi ha ka elekshon MLA 2018, dei hangtei u la ong ba ka la mih noh ka jingiakren kai kaba u ong ‘Lah ia khun u kpa te, u khun u hap bynda lut ki jingdon jingem’ , U bah Witting u ong ba katei ka jingkren kai jong u ka dei beit tang ka jingiakren paralok kaba mut ba u khun u hap trei shitom ban pynjop ia u kpa lada hap ban die lut ki jingdon jingem ruh, “Shi paralok te phi, mano bym ia kren kai, ngam poi pyrkhat pat de ba un da leit thad haduh ki kotkhubor ruh, shi shi shi to ym lei lei” ong u bah Witting bad ka rkhie haba ia kren lyngba ka phone.
La sngewthuh na ka jingiakren ba u bah Witting u la babe bha ia katei ka jingiakren kai ha dukan ha Nongstoiñ.