Kumba lehkai iarieh, ka Municipal bad ki Nongdie madan

Shillong, 04 Nohprah:
Ka jingkhynra nongdie madan ka Shillong Municipal Board ka long idanda shi rukom namar ka long kumba ialehkai iarieh hapdeng jongki.
Mar ia wan ki briew ka Municipal, ki nongdie madan ki phet, mar ia phet ki briew ka Municipal, la wan mih biang ki nongdie madan bad kane ka la jia ha ki jaka kum ha thain Motphran, bad thain GS road.
La iohi ba mynsngi ka Municipal ka kurup ia ki tiar hynrei janmiet pat la dap biang ki nongdie madan bad ki tiar ki tar. Don ki jaka kum ha lynti Bhutia, la iohi ba ki dkhar ba die almuri ki jah kai tang shiphang ba don ki briew ka Municipal, lait nangta, ki die kumjuh kumba ju long man ka sngi.
Ha kawei ka liang, ki nongdie madan ha kane ka sngi Saitjain kila bteng ia ka jingiakhih kaba jar jar ka jong ki da kaba rah ia ki plakad ha ki jaka ba ki juh shong man ka por ban pynpaw ia ka jingpyrshah ia ka jingwan khynra ka Municipal.
Ka Municipal ka la pynlong ia ka jingkhynra ia ki nongdie madan ha baroh kawei ka nongbah Shillong ki jaka ba hap hapoh jongka, hadien ba la pynmih ka High Court ia ka hukum ban nym shah shuh ban die madan.
Hynrei ka la bthah ia ka sorkar ba kan pynwad jaka ia ki hynrei haduh mynta, ka sorkar kam pat ioh jaka satia nalor ba kam pat shim jingkhein katno ngut ki don ki briew ba die madan.