“Lada duh doh masi ki paidbah, dei ban kynnoh ia ka KHADC bad Hima Mylliem”

Shillong, 2 Nohprah:
Ha ka sien ba-ar ka jingwan ia kynduh jong ki ia u CEM , ki nongot doh masi kim shym ioh jubab kaba shai na u CEM u bah Pynshngaiñ N Syiem bad u la khot jingialang biang ia ki ha ka 7 tarik mynta u bnai bad ha katei ka jingialang u la khot lang ruh ia u Syiem ka Hima Mylliem bad kumjuh ia ka tnad Veterinary ban pynbeit halor ka jingdawa jong ki ban ksam shkor ia ki masi bad ban leh eksamin.
Namar ka jingbym hun ia ka jubab na u CEM, ka Khasi Jaintia Butcher’s Welfare Association ka la rai ban dang bteng ia ka jingsangeh thied masi jong ki na iew khanapara. “Ngi kum ka seng ngi hap ban bteng iaka jingsangeh thied masi na Iew Khanapara bad ngin ap ia ka rai ka ban mih hadien ka jingialang ka ban long ha ka taiew ban wan , lada ki paidbah ki duh ban bam doh masi, ki dei ban kynnoh iaka KHADC bad iaka Hima Mylliem namar lada ka seng kam shim da ki sienjam kiba tyngeh ka dor jongka doh kan dang kiew shuh shuh bad kan ktah ia ngi kum ki nongkhaii bad ia ki paidbah kiba bam doh” ong u bah Generous Warlarpih General Secretary katei ka seng.
U General Secretary ka FKJGP pat u bah Dundee Cliff Khongsit u la ong ba u CEM u la ong ba um kwah ban pynsangeh ia ka jingksam shkor bad pyndeng khoila ia ki masi, hynrei u ong ba um kwah ban mih ka jingiatyngkhuh hapdeng ka tnad sorkar bad ka District council kumjuh bad ka Hima Mylliem.
Utei u nongialam FKJGP u la ong ruh ba u CEM u la kubur ba ka jingai Challan ka kong Lucy Syiem ka nongwai ia ka iew khanapara sha ki trok kit masi ka dei kaba be-aiñ bad u la kular ban pynsangeh noh mardor.
Ula ong ba ka Council ka don iaka bor ban ai Transit Pass ban wanrah ia ki mar kiba na shabar hynrei ka M/S Lucy Sawkmie ka la leh da khongpong bad iaid ha ka lynti kaba be-ain da kaba ai challan be-ain ia ki nongkhaii ban khaii masi Pynursla ne Laitlyngkot, kumta halor kane ka nongrim ka seng ka dawa na u CEM ba ka dei ban pyndam noh iaka jingaiwai ha ka M/S Lucy Sawkmie namar kam shym la iaid katkum ki kyndon bad kala pyndonkam bakla ia ka bor tang na ka bynta ka jingmyntoi shimet.