Rung Congress, u pulit rim

Nongstoiñ, 2 Nohprah:
U bah Twinly Roy Marwein u wei na ki Officer Incharrge barim ka Nongstoin Police Station u ba la shong thait noh na ka kam mynta la katto katne por ha ka sngi Thohdieng jong ka taiew u la leit ban pyniasoh noh ia lade sha ka party congress ha ka jingialang kaba la long ha Congess Bhavan ha Nongstoin. Ha katei ka jingialang la iadon lang ruh u bah N.Nongdkhar MDC barim ka Nongstoin u ba long ruh kum u Delegate MPCC, bah B.K.Bani Chief Adviser ka NBCC, u bah F.Lyngkhoi Chief Adiviser DYCC, bah F.Shangdiar President Congress Mawlieh Primary Unit, bah P.Marthong President barim ka DCC , u bah J.Mawlot u wei na ki dkhot ka party Congress kiba la pdiang sngewbha ia u bah Marwein sha ka party.
Haba iakren bad ki nongthoh khubor hadien bala wai katei ka jingialang na ka liang jong u bah Twinly Roy Marwein u la ong ba kaba pynlong ia u ban rung sha ka party congess ka long ba u don ia ka jingsngew ieid ia katei ka party bad u la pynpaw ruh ba hadien ba u la shongthait na ka kam kum u ophisar ha ka tnad pulit u dang don ka mynsien na ka bynta ban ai ka jingshakri ia ki paidbah bad lyngba ka party congress u la ong ba un sa lah ban bteng biang ia ka kam shakri paidbah. Katba na ka liang jong u bah N. Nongdkhar haba iakreh bad ki nongthoh khubor u la ong ba “Ngi pdiang ia u bah Marwein ha ka seng ka congress da kaba u la rung lyngba ka Rambrai Jyrngam Block Congress Committee (RJBCC) hynrei namar ba ki nongkitkam jong ka Rambrai Jyrngam kim shym la lah ban ia don bynta namar ba ki leit ha la ki jong ki jong ki prokram kaba iadei bad ka election shiteng samoi kumta la ia pynbeit ban pdiang sngewbha ia u ne u rangbah lyngba jong ki nongkit kam jong ka DCC”
Shuh shuh u bah N.Nongdkhar u la ong ruh ba ka jingwan rung u bah Marwein ka long ka dak jong ka jingkyrmen ia u kyrtong jong ka Congress na Rambrai u bah Kimfa Marbanniang ban ioh ia ka jingjop kaba don burom ha kane ka election shiteng samoi.