Jur ka dheng kali ha Iew Mawlong, ba rung ki trok mynsngi

Shillong,24 Naitung:
Ka jingdheng kali ha iew Mawlong ka long ka kaba ju jia khah khah bad la jan man ka sngi, kane ka jingdheng kali ka dei namar ka daw ka jingrung jong ki trok ha ka por mynsngi. Ki trok kiba wan pynhap tiar sha ki dukan khar kaia ki la bun bha ha kine ki sngi ba la dep hynrei mynta hadien ba la mana ban rung kitei ki trok heh ka kham duna, wat la ki dang don hi katto katne na ki kiba dang wan rung ha ka por mynsngi.
Nalor ki trok heh la iohi ruh sa ia ki trok rit kiba wan pynhap phan bad kiwei ki mar ha ka por mynsngi ha Iew Mawlong kaba la wanrah ia ka jingdheng kali kaba jur hangtei khamtam ha ki jaka ba ieng ki Bus Sohra. Shuh shuh nalor kitei ki trok sa ki kali kit nuit ka tnad Municipal ki la wan ban pynkhapngiah ha kaba la iohi ba kitei ki kali kit nuit ki wan ban thep nuit ha ka por mynsngi kaba baroh shi katta ki ju wan ha ka por mynstep.