Lada khang masi Bangla, ki nongdie doh, kin pynhiar ia ka dor doh masi

Shillong,1 Nohprah:
Ki nongdie doh masi kiba don ha ka kynhun Khasi Jaintia Butcher’s Welfare Association ( KJBWA) ki la kular sha ki paidbah ba lada jia ba ki lah ban khanglad ia ka jingiaid ki masi khaii tuh sha Bangladesh khlem pep kin pynhiar ia ka dor ka doh masi na kaba ki ju die mynta. Ia kane la pynpaw da u Publicity Secretary katei ka seng u bah Wankerlang Lamare haba ia kren bad ki nongthohkhubor mynhynin ka sngi.
Utei u nongialam ki nongdie doh u la ong ba lada lah ba khang ia ka jingiaid ki masi khaii tuh sha Bangladesh ka dor ka masi na iew die masi ha Khanapara ruh kan nanghiar bad lada ka dor masi ka nanghiar kin pynhap ruh ia ka dor iew na kaba ju die mynta. Kumba ka long mynta katei ka seng ki nongdie doh ryngkat ka jingiatrei lang bad ka FKJGP ki iai peit siar ba nioh kem ia ki masi ba thmu khaii sha Bangladesh.
Kumba ka long mynta u bah Lamare u la ong ba ka dor iew ha Khanapara ka dei T.18 hajar tyngka shaneng uwei u masi bad lada jia ba lah ban khang ia ki masi Bangla kan kham hiar na katei ka dor kaba mynta. U la iathuh ruh ba ki nongot doh masi ki donkam masi kumba 1200 spah tylli ha ka shi taiew bad ki masiki poi ha iew khanapara kumba 1400 tylli ha ka shi taiew.
Lah ban kdew ba ka FKJGP ka la thaw ia ka kynhun ban ap thap ia ki masi ba thmu ba khaii tuh sha Bangladesh bad katei ka kynhun ka dei kaba la tip kum ka Cattle Smuggling Prevention Team. Haba ia kren bad u General Secretary ka FKJGP u bah Dundee Cliff Khongsit u la ong ba katei ka kynhun kan peit bha ia ka iaid ka ieng ki trok kit masi bad haba ioh bat kan kylli tohkit ki dei ki masi kiba mut ban pyniaid shano bad hadien kan sa pynthikna pat na ki nongdie doh la ka dei ne-em ka masi jong ki bad lada kam dei kin bat bad aiti sha ki pulit.
Haba kylli kaei ka lad jingiada katei ka don na bynta ki dkhot jong ka lada jia ba ka don ka jingpyni bor na ki trok khaii masi be-ain sha Bangladesh, utei u nongialam sengbhalang u la ong ba ki dkhot katei ka seng ki la tip kumno ban iada ialade bad kan ym poi ruh sha u pud ba kin mynsaw, “Ngi la tip kumno ban iada ialade bad kata ka shong ha ka jingstad jong ngi kaba ngim lah ban pynpaw ha phi ki nongthohkhubor” ong u bah Dundee u bym kwa hban kren bniah ia ka rukom treikam katei ka kynhun.