“Ngi ki kyllut, ki matlah, ki dkoh, ngi thad sngi hangne ba kynruh ka kpoh”

Shillong, 01 Nohprah:
Kiba duna dkhot met hynne ka sngi hapoh ka lama ka Khasi Disabilities Association (KDA) na kylleng ki jaka ka Ri Khasi ki la hap ban mih madan ban shong kyrain ha phyllaw ka Additional Secretariat, Shillong ban dawa na ka sorkar ia ki jingeh jongki.
“Ngi kiba kyllut, matlah bad dkoh, ngi thad sngi hangne ba kynruh ka kpoh”, “Sorkar phi ai baibam 16 tyngka haduh ngi lah ban im”, “Ai khaw baduk ia ngi”, “Sorkar ai ia ki hok jong ngi ba ngin shong khop man ka sngi”, ki dei ki katto katne ki jingthoh plakad jong kine ki briew ba duna dkhot met.
Kine ki briew ba duna dkhot met, ki la shah pynbor ban mih madan hadien ba ka sorkar jylla kam shym la bat ia ka kular jongka, wat hadien shisnem ba ki la iai ap. U President ka KDA u Bah Starwin Kharjana uba don jingduna bor ioh sngew, haba kren hynne sha ki nongthoh khubor, u la ong ba ka seng mynshem snem ka la ioh ia ka jingkular na ka myntri sorkar ban pynurlong noh ia ki jingdawa jongki kum ka jingpyntreikam ia ka bhah thungkam kaba 3 percent katkum ka Persons With Disabilities Act 1993, ha ki tnad sorkar, hynrei hadien shi snem ruh khlem urlong eiei.
“Ngi la iakynduh ia ka myntri sorkar ba don lang ki ophisar sorkar mynshem ha ka 2 tarik Nohprah, 2015 bad ngi la ioh ia ka jingkular ba kin pyntreikam ia ki jingdawa jong ngi, hynrei hadien shisnem ruh ba ngi la iai ap, khlem urlong eiei bad na kane ka daw, ngi la hap ban mih madan mynta ka sngi”, la ong u Bah Kharjana. U la ong kiwei ki jingdawa ki long ban thung san ngut ki briew ba duna dkhot ha ka State Coordination Committee, ban mang kyrpang 3 percent ia ka permit kamai taksi kiba aplai ram na ka National Handicraft Finance Development Corporation Ltd (NHFDCL), ban ai iing baduk ne ka Pradhan Mantri Awaas Yojana-Gramin (PMAY-G).
U Bah Kharjana u la ong ba ka seng ka la dawa ruh ba ka sorkar ka dei ban mang kyrpang ban rung klas, skul ki briew ba duna dkhot met bad ka baibam. “Ngi dawa ruh ba ka sorkar ka dei ban ai baibam lyngba ka Chief Minister Social Assistance Scheme ia ki briew ba duna dkhot met da kaba pynshong nongrim na ka syrnot (disability certificate), ym na ka jingioh kamai jong ka longïing”, la ong u bah Kharjana.
Kine kiba duna dkhot ki la pynlong ia ka jingshong kyrain naduh ka por 10 baje mynstep haduh 2 baje janmiet bad ki la rai ban bteng biang ia kane ka jingiakhih ha u bnai ban wan lada ka sorkar jylla kam sngap kam pynurlong ia kine ki jingdawa jongki.