6tarik, khot U Bah Shylla ia U Bah Kennedy

Shillong,1 Nohprah:
U kyrtong ka UDP na Nongkrem konsti-twensi u bah H.S Shylla u la dawa ba u bah Kennedy Khyriem MLA ka Mawphlang u dei ban pynshai paidbah halor ki jingkynthoh pyrshah jong u ia u (Shylla) ha ka jingialang kaba la long ha Smit ha ka 28 tarik u naiwieng. U bah Shylla u la ong ba u bah Kennedy u dei ban pynshai paidbah ha ka 6 tarik mynta u bnai shuwa ba u bah Shylla un ai jingkren paidbah ha Smit. U la byrngem ba lada jia ba utei u MLA ka seng Congress um lah pynshai paidbah un aiti sha ki riew said-aiñ ban leh katkum ki kyndon ka aiñ.
U bah Shylla u la bitar ia ka jingkren u bah Kennedy ha ka por ba u ialap elekshon na bynta u kyrtong ka seng Congress u bah Lambor Nongrum ha kaba u la ong ba ka Lineage Act ka ktah bha ia ka jaitbynriew bad u la ong ba la pass ia katei ka Bill ha ka por long CEM u bah Shylla. U bah Shylla u la pynshai ba katei ka jingkren ka dei ka jingpynjahburom ia u ( Shylla) ha khmat ki paidbah ka Nongkrem konstitwensi bad u la ong ba ha ka por ba pass ia ka Lineage Act ha ka 13 tarik u lber, 1997 um pat long tang u MDC ruh bad la ioh jingmynjur na u Lat ha ka 23 tarik u rymphang, 2005 bad pynmih ha ka Meghalaya Gazette ha ka 25 tarik u rymphang, 2005.