Hiar kyndang ka KHADC ia ki trok kit maw na thain Rngain sha Bangladesh

Shillong, 30 Naiwieng:
Ka tnad Enforcement ka Khasi Hills Autonomous District Council mynta ka sngi ka la hiar sha ka thain Pynursla bad Rngain ban khynra ia ki kot ki sla jong ki kali bar jylla, hadien ba la ioh jingujor na ka Khasi Students’ Union South Central East Circle, Pynursla sha u Executive Member ka Trade u bah Neil Antonio War.
Hapoh ka jingialam u Asst. Superintendent u bah D Nongsiej la don lang ki dkhot ka KSU hapoh ka jingialam u samla Ennocent Khongstia, President bad u samla Ksanborlang Thabah u General Secretary ki la ai ka jingiatreilang bad kane ka tnad ha kane ka sngi ban khynra ia ki kot ki sla jong ki kali kiba don ia ki Registration Number na kiwei pat ki jylla kum na Assam, Nagaland bad kiwei kiwei. Ka thain Pynursla bad Rngain ka dei kawei ka jaka pynmih mawlieh kaba khlain bha ha kaba la ju shalan ia u tei u maw shaduh ri Bangladesh. Hynrei na katei ka jingiohlad ki kali ban kit maw sha Bangladesh la wan poi ruh ki kali nabar jylla ia kiba wan ban kit nong sha kane ka bynta.
Hynrei katkum ki jingtip ba la ioh lum da ki dkhot ka Seng bad Enforcement ka long ba bun na kitei ki kali ki dei kiba la dei trai da ki Khasi kiba shong ba sah ha ki thain Pynursla, hynrei ha ba pyrshang kylli ia ki kot ki sla la shem ba kim don satia ha ki kali bad ka tnad Enforcement ka la shim khia ban wad pat ia ki trai jong kitei ki kali. Na ka liang ki draibar trok kiba kit maw ki pynpaw ba ki kot ki sla ki don bad ki malik bad ki ioh beit ban rung shaduh ri Bangladesh ban leit pynhap maw.
Na ka liang u samla Ennocent u la pynpaw ba kane ka kam ka dei ka benami bad u pynpaw ia ka jingkhublei ia ka KHADC bad tnad Enforcement ki ba la hiar ban shim khia ia ka jingdawa bad jingujor ka Seng.
“Ka Seng ka pynpaw ia ka jingsngewkhia halor kane jingiohlad ki kali na bar jylla ban ioh kamai sha kine ki thain”, la ong u samla Ennocent.Na ka liang u General Secretary ka Seng u samla Ksanbor Thabah u la pynpaw ba na ka ka liang ka seng ka sngew ruh ban pan jingshai na ka tnad Transport ban shim khia halor kane ka bynta kane ka kam.