Ngim don pisa, ngi long lyngkhuit, ngi don ka nongrim ka jaitbynriew: Adelbert

Shillong, 29 Naiwieng:
3 ngut ki kyrtong ka KHNAM ki ban ia khun ha ka elekshon MDC shiteng samoi ka ban long ha ka 13 tarik u nohprah, 2016 ki la bam smai mynta ka sngi ba kin ym phet na katei ka seng hadien ba ki la ioh ia ka jingjop. La pyntian smai ia ki da u President Rangbah ka KHNAM u bah Pyndapbor Saibon ha ryngkat ka jingdonlang ki nongialam ba hakhmat katei ka seng kum u bah Adelbert Nongrum, Working President –MDC jong ka Jaiaw, la donlang ruh u bah Batkupar Wahlang General Secretary, Thomas Passah –President KHNAM state Youth Wing bad kiwei pat.
Ki 3 ngut ki kyrtong ka KHNAM kiba la bam smai mynta ka sngi hakhmat u mot Tirot Sing uba ieng ha State Central Library ki long u bah Bankhraw Kharbuli na Laban-Mawprem konstitwensi, u bah Edar Lyngdoh Nongbri na Nongkrem konstitwensi bad u bah Pyndapbor Lyngdoh Marshillong u ban ia khun na Mawthadraishan konstitwensi. Kitei ki 3 ngut ki kyrtong ki la bam smai ba kim ym phet na katei ka seng hadien ba ki la ioh jingjop bad ki la smai ruh ba kin buh ia ka jait bynriew hakhmat eh.
Haba kren sha ki nongthohkhubor kitei ki 3 ngut ki kyrtong ki la pynpaw ia ka jinglong skhem jong ki ban neh ha ka Party KHNAM , u bah Edar Lyngdoh Nongbri u la ong ba un iaineh ha katei ka party lada rem ne jop ha kane ka elekshon, u bah Bankhraw Kharbuli u la ong ba lada u ioh jingjop un iaineh bad katei ka party.
U President ka KHNAM u bah Pyndap Saibon u la ong ba ka daw ba ka KHNAM ka pynbam smai ia ki kyrtong jong ka ka dei namarba ha District Council kam don satia ka aiñ ka ban tehlakam ia ka jingkyntiap seng hynrei da katei ka rukom kan pynlong ia ki ba kin don ka jingsngew bad ka mynsiem jong ka jingiatiplem. Halor ka jingphet seng noh ar ngut ki MDC bah Latiplang Kharkongor bad u bah Process T Sawkmie u bah Pyndap u la ong bay m lah ban bat jubor iano iano ruh haba ki la mon ban phet na ka Party bad u la pynkynmaw ruh ba u bah Latiplang um shym la bam smai shuwa ka elekshon MDC namarba ha katei ka por um lait ban ia donlang katba u bah Process T Sawkmie pat u la bam smai ban ym phet seng, “Ka shong ha ka jingtip lem jong u briew” ong u bah Pyndap.
U bah Adelbert Nongrum -Working President u la ong ba ka KHNAM ka la pynieng tang 3 ngut ki kyrtong na ki 7 tylli ki konstitwensi kam dei na ka daw ba kam don briew hynrei u la ong ba ki la don bunbah ki kyrtong kiba la wan pan tiket na kitei ki 7 konstitwensi hynrei ka Party KHNAM ka bishar shuwa bin ba pin shuwa ban ai tiket bad ban tip ba u b riew uba ia khun elekshon na katei ka seng un buh shuwa ia ka jaitbynriew hakhmat. U la ong ruh ba don ki kyrtong kiba pan tiket da ka jingkyrmen ba ka KHNAM kan ai pisa ia ki, “Ngim don pisa, ngim don eiei , ngi long lyngkhuit hynrei ngi don pat ia ka nongrim jong ka jaitbynriew” ong u bah Adelbert.