Byrngem ia khih ki samla pule Aiñ

Shillong,28 Naiwieng:
Ki samla pule Aiñ ki la byrngem ia khih ban pyrshah ia ka skulbah NEHU namarba kam sngap ia ki jingdawa jong ki bad kane ka jingbyrngem jong ki ka dei hadien ba la kut noh ka por ba ki la buh ia katei ka skulbah kata 15 sngi.
U President ka Student Bar Association u Peter A Dohkrut haba kren sha ki nongthohkhubor mynta ka sngi u la ong ba ka NEHU kam sngap ia ka jingdawa jong ki halor ki jingeh ba ki samla pule aiñ jong ka NEHU bad kiwei pat ki kolej ba ia soh bad ka kum ka jingpynslem ban pynmih ia ka resol, ka jingai mark sha ki samla pule kiba pule ia ka Course LLB kaba 3 snem.
“Ngi la rai ban iaid shakhmat ia ka jingiakhih , ngi la ai ia ki mat jingdawa ha bnai ba al dep ka por ba ngi la uh ka la kut” ong u Peter Dohkrut. U la ong ba ia katei ka mat dei ban shimkhia lang da ka sorkar jylla bad sorkar pdeng, ki mat jingdawa jong ki-ki long ka jingpynslem ia ka resol, ka jingai mark bakla bad ka jingwanrah da ka internal assessment. U la ong ba ka NEHU ka la pynslem ban pynbna resol la 8 bnai mynta bad katei ka la pynduhnong ia ki naba ym shah ia ki ban ia leh ia ka eksamin ka bar kaba ju pynlong arsien ha ka shisnem. U la ong ba ki samla kiba pule ia katei ka Course ba lai snem ki shem jingeh ban ioh 60 mark.
U la ong ba mynshem snem tang 2 ngut ki samla na ki 109 ngut ki samla jong ka Shillong Law College ki la lah ia ka 6th Semester kaba mut 99.8 na ki la pynbna ba ki pheil. Hynrei hadien la lap lyngba ka RTI ba la shu ai mark antad bad kyllum ia baroh khlem da bishar bha ha kaba kiba thoh ia ka jubab ba dei ruh la ai kumjuh ka mark bad ki bym thoh bha.
U la ong ruh ba ia ka jingai mark ha ka internal assessment la dei ban ai kumba ka NEHU ka ju ai ha kiwei pat ki eksamin jong ka hynrei ki shym ioh ia katei ka mark kaba 40 na ka shispah. “Ka sorkar jylla ruh kam leh eiei” u la ong biang bad u la byrngem ruh ban leit rah ia katei ka mat sha ka myntri jong ka Higher and Technical kong Roshan Warjri. U la ong ruh ba ka SBA kan ia treilang bad ki samla ba pule aiñ ha Jowai Law College, West Jaintia Hills bad Tura Law College, West Garo Hills, kiba ia kynduhlang ia katei ka jingeh.