Ia ka kyiad ba ioh kurup, la ju lilam sha kiba buh Winestore

Shillong, 23 Naitung:
Ia ka kyiad ba ju ioh kurup la ju die lilam (auction) da kaba khot tender ia kito ki briew kiba don ia ka licence. Kito ki ba don ia ka licence ki lah ban thied ia kito ki kyiad da kaba thep tender.
“Kito kiba nud ban pan ka dor kaba heh duh la pyllait noh sha ki”, la iathuh u wei u heh jong ka tnad Excise.
La iathuh ruh ba lada ioh kurup ia ki kyiad phareng ka tnad Excise ka ju khot ia ki briew ban thep tender hynrei haba iadei bad ki kyiad pyrsi kane ka tnad ka ju bret noh ia ki.
Une u heh jong ka Excise u la iathuh ruh ba ia kane ka jingdie lilam ia ka kyiad um ju pyllait ha ki kotkhubor, hynrei ki shu phah da ki kot sha kito ki briew kiba don ia ka licence.
Ha kaba iadei bad ka kyiad pyrsi la iathuh ba ia ki nongdie la ju ai licen da ka Hima ha kaba ki lah ban die kyiad pyrsi hynrei ki dei ban shet da u krai. “Kito ki pata kyiad kiba shet da u khaw kin shah kyndang ha ka tnad Excise”,la ong u heh jong kane ka tnad.
Ha kajuh ka por la iathuh ruh ba ka tnad jong ka Excise ka ju pylong ka jngkhynra man ka por ha kito ki jaka haba ki ioh jingtip ba don ki jingdie tuh ne die beain ha kano kano ka jaka. Hynrei u la iathuh ruh ba ka tnad jong ka Excise ka ju iakynduh jingeh bha haba ki ju pynlong ka jingkhynra namar ba ki nongdie ki ia sianti bha bad bunsien shuwa ban poi ki briew jong ka Excise ki ju ia burieh lut ia ki kyiad ki ba ki iadie tuh bad kane ka tnad kim lah ban kem ia kito ki briew ki ba die lada ki khlem ioh ban kurup ia ki kyiad.