Ia khyrwit ki Commando bad ki GNLA, kurup bun ki tiar siat

Shillong, 28 Naiwieng:
Hadien ba la ioh jingtip kaba paka ki pulit Special Force-10 commandos ka East Garo Hills ki la leit khynra ia ka ktem ka GNLA , ki pulit ki la ioh kurup bun bah ki tiar siat. Katei ka la jia ha ka shnong Gongre, ki pulit ki la ioh 245 tylli ki kuli AK bad 45 book ka shithi dawa pisa ka GNLA.
Hadien ba la wanphai na katei ka jaka, ka la don ka jingiather kuli hapdeng ki lehnoh GNLA bad ki pulit ha Darimgre kaba hap hapoh Williamnagar Police Station, ha kaba ki lehnoh ki la ap thap ban shut her kuli kynsan sha ki pulit, ha katei ka jingjia ym don jingmynsaw.
Lah ban pynkyn-maw ba ha ka taiew ba la dep u Ruga T Sangma, u dkhot ka GNLA uba iajan bha bad u khliehduh jong ka Sohan D Shira u la kyllon iap ha ka jing-synreit kuli ki pulit hajan ka shnong Songma Adugre, sha shilliang ka wan Simsang ha East Garo Hills.