Ka dei ka jingsngewthuh U Dr Don kum nongialam, ong u Bah Jemino

Shillong, 25 Naiwieng:
U General Secretary ka UDP u Bah Jemino Mawthoh u la ong ba ka jingkren jong u President u Dr Donkupar Roy ba ka sorkar pdeng NDA kam nym tih uranium shuh ha  kane ka jylla, ka dei ka jingkren na ka jingtip bad ka jingsngewthuh jongu kum u nongialam ba la rim bha ha ka jylla.
Haba twad jingmut halor kane myta ka sngi, u Bah Mawthoh u la ong, “Na ka liang ka party bad ma u, kum u general secretary um pat don jingtip halor kane, hynrei lehse na ka liang  u Dr Don, u lah ban don ka jingtip kaba kham biang”,.
Ha ka jingialang ha ka sngi Nyngkong ha Smit, u Dr Donkupar u la ong ba ka sorkar NDA kam don jingthmu shuh ban tih uranium ha kane ka jylla Meghalaya, bad kane ka jingkren jongu, ka la pynmih bun ki jingpynrem na ki kynhun sengbhalang, ki seng sain pyrthei, ba ka dei tangka jingkren politik.
“Na ka liang ka party, kumba ka la ju ieng naduh mynshwa, ka nongrim jongka kam pat kylla ban pyrshah ia ka jingtih uranium ha kane ka jylla”, la ong u Bah Mawthoh bad bynrap,  ka party kam pat don kano kano ka jingiakren halor kane.
U la ong ba um pat ioh iakren ia u President ka UDP halor kane ka kam ban ioh jingshai kham bha hynrei kaei kaba la paw ha ki lad pathai khubor, ka dei ka jingkren na ka jingtip bad ka jingsngewthuh jongu shimet, kaba u lah ban kham tip kum u nongialam ba la kham rangbah ka jylla.
Ha kawei ka liang u general secretary ka UDP u la ong ba ka NPP ka la rai ban ai ia ka jingkyrshan ia u kyrtong ka UDP na Rambrai konstitwensi ha kane ka elekshon MDC shiteng samoi. Ka UDP ka la pynieng ia u Bah Morningstar Tympuin ha kane ka kynti.