Yn iaid proseshon ki kynthei ha Shillong bym nud iaid miet shuh

Shillong,24 Naiwieng:
Ki kynthei ha kine ki sngi kim nud shuh ban iaid miet, ong ki kynhun bapher bapher haba kren sha ki nongthohkhubor mynta ka sngi. Dei na kane ka daw ba ka kynhun jong ki kynthei kin pynlong ia ka jingia iaid proseshon lashai ka sngi ka 25 tarik u naiwieng ban rakhe ia ka International Day for Elimination of Violence Against Women bad ka phang pdeng jong katei ka jingrakhe ka dei “Claim back the Night”. Ia katei ka jingrakhe yn pynlong da ki kynhun jong ki kynthei kaba kynthup ia ka Meghalaya State Women Commission (MSWC), NEN bad kiwei pat.
Ki kynthei kin iaid proseshon ryngkat ka rah Dongmusa naduh Don Bosco , Laitumkhrah haduh Fire Brigade “Ki kynthei ki don kajuh ka hok ban sngew shngain haba iaid mynmiet” ong ka kong Joy Syiem programme manager ka NEN kaba la ong ba ka phang pdeng “Claim Back the night” dei ka jingiakhih kaba la sdang hadien ka kam shah batbor ‘Nirbhaya’ kaba la jia ha New Delhi. Ka la ong ruh ba shen ka north East Network kan pyllait ia ka ripod jong ki nongbah kiba shngain na bynta ki kynthei.
Ka kong Theilin Phanbuh, Chairperson ka MSWC ka la ong ba ka komishon ka la phah ia ka jingtyrwa na ka Nirbhaya Fund na ka bynta ban tei ia ka jaka sah ki kynthei ha kane ka jylla. “Ka task force committee kan eksamin ia ka jingtyrwa ka komishon” ka la ong.