Kren lap lah u Dr. Don, ong ka KSU

Shillong, 24 Naiwieng:
Ka KSU South West Khasi Hills District ka la pynrem jur ia u Dr.Donkupar Roy President rangbah ka seng UDP , u MLA ka Shella bad u nongialam ka Liang pyrshah ha ing dorbar thaw-aiñ ka jylla, ka KSU ka la ong ba ki jingkren u Dr.Don ba ka sorkar India kam don mon shuh ban tih Uranium ki dei tang ki jingkren laplah bad ki nia politik tang ban pynjop ia u kyrtong ka UDP na Nongkrem ha kane ka elekshon MDC shiteng samoi.
Ka kyrwoh khubor na Jiedskhem Nongsiej Asst. General Secretary katei ka seng u la ong ba ka sorkar NDA kam pat kren shai hynrei u Dr.Don u nud ban kren kumtei. Ka la kynnoh ba ki jingkren u Dr.Don ki dei ki jingkren kiba buhrieh ia ki jingshisha da kaba tap eit miaw ia ka jingleh u bah H.S Shylla ha ka por ba u bat kum u CEM ka KHADC halor ka mat Uranium. Ki paidbah kim dei ban shah pynbiej ha ki ktien shu thaw jongno re jongno kiba pyrkhat tang ia ka jingkhlaiñ ka seng sain pyrthei jong ki da kaba iehnoh noh sharud ia ka mynsiem ieit jaitbynriew, ong biang katei ka kyrwoh khubor.