Thep kyrteng u kyrtong ka UDP ha War East

Jowai, 24 Naiwieng:
U kyrtong ka UDP, u ma First born Manner, mynta ka sngi u la wan ban thep kyrteng ia lade ha khmat ka Returning Officer kaba dei ruh ka Sub-Divisional Officer, ka Amlarem Civil Sub-Division.
U President ka District UPD, u ma Moonlight Pariat bad ka MDC na Khiehriat ka kong Violet Lyngdoh ha ryngkat ki nongtrei ka Party bad ki spah ngut ki nongkyrshan ki la wan ban kyrshan ia u ma First born Manner sha SDO office uba la wan ban thep kyrteng ia lade na ka  bynta ban iakhun ia ka election shiteng samoi sha ka iing dorbar jong JHADC hadien ba u ma Stephan uba long u MLA u la iehnoh ia ka kam MDC na katei ka thain.
Ha katei ka Constituency, ki don haduh 4 ngut ki kyrtong kiban ia aireng kiba kynthup ia u kyrtong ka INC u ma Lamdibok Sumer uba dei ruh u CEM barim ka JHADC, u ma Lotsing Lakuna u kyrtong shimet uba la ioh ruh ka jingkyrshan jong u MLA ka thain bad kumjuh u kyrtong ka BJP u ma S Kyndait.
Napdeng kitei ki saw ngut, tang u ma First Born Manner uba la wan thep kyrteng ia lade mynta ka sngi.
La khmih lynti ba kiwei pat ki kyrtong kiban ia aireng kin wan thep kyrteng naduh lashai ka sngi Thohdieng ter ter haduh ka 28 tarik.