Shen yn tyrkhong doh masi ka jylla, 25 tarik yn sangeh thied masi

Shillong, 23 Naiwieng:
Shen ki paidbah kane ka jylla kin mad ia ka jingtyrkhong doh masi naba naduh ka 25 tarik mynta u bnai kaba dei ruh ka sngi thohdieng ki nongot doh masi ki la shim ia ka rai ban sangeh thied masi na Iew Khanapara, Ri-Bhoi District. Katei ka jingsangeh ki nongot doh ban thied masi ka dei ban pynpaw ka jingpyrshah ia ka KHADC bad ka Hima Mylliem ba kim shah ban pyntreikam ia ka jingleh eksamin bad ban ksam shkor ia ki masi.
U Vice President ka Khasi Jaintia Butcher’s Welfare Association u bah Generous Warlarpih u la iathuh ba ka jingsangeh thied masi kan sdang naduh ka sngi thohdieng bad kat iai bteng katba ka KHADC bad ka Hima Mylliem ki dang khanglad ia ka Veterinary ban eksamin bad ksam shkor ia ki masi. Ia kane u la iathuh hadien ka jingwan ia kynduh ia u Director ka tnad Animal Husbandry and Veterinary u Dr B Rijai mynhynin ka sngi, la synran ia ki da ki nongialam ka FKJGP.
U bah Warlarpih u la ong ba ka jingleh ka Veterinary ka long kaba biang eh naba kan lait ruh na ka jingiaid tuh ki masi sha Bangladesh hynrei ki la ioh jingtip kynsan kynsan ba ka Hima Mylliem kan pynsangeh noh ia katei ka jingksam shkor naduh ka taiew ban wan. U la iathuh ruh ba u Executive Member ka KHADC uba peit ia ka iew ka hat u la ong ha ki ba hap ban pynsangeh ia kane namarba ka don ka jingkhrong pisa be-aiñ.
Shuh shuh utei u nongialam ki nongot doh masi u la iathuh ba na bynta ban eksamin ia ki masi la shim pisa T.10 tyngka uwei katba ban ksam shkor pat la shim T.15 tyngka uwei kaba mut hap ban pynlut T.25 tyngka na bynta uwei u masi bad ia katei ka pisa hap ban siew da ki nongthied masi, bad u la pynpaw ka jingsngewkhia ba ym don nongujor ia katei ka jingsiew pisa hynrei ka KHADC bad ka Hima Mylliem ka la tuklar.
“Kine ki artylli ki tnad treikam ki pynsuba jur ia ngi ba ki don eiei sha lyndet namar shisien ba la pyndeng ia ki ear tag ka pynshisha ba ki dei kiba biang ban bam doh bad kan buh ha ka jingeh ia kito kiba ju donkti ha ka ban shalan tuh sha Bangladesh ia ki masi” ong u ban Generous Warlarpih. U la ong ba katei ka jingkhanglad ka KHADC bad Hima Mylliem kan pynlong ia ki nongot doh ban die rem ia ka doh masi naba ki hap thied ha ka dor kaba rem bad kan pynshlu ruh ia ki nongkhaii tuh sha Bangladesh.
Ka FKJGP ka kyrshan ia katei ka jingiakhih jong ki nongot doh ha kaba u Secretary jong ka u Dundee Cliff Khongsit u la dawa na ka tnad Animal Husbandry and Veterinary ba ka dei ban iaid shakhmat katkum ki kyndon ain jong ka sorkar Animal Transport Rules 2001 katkum ki Rules 97 & 98 khlem sngap iano iano ruh bad ban bteng ia katei ka kam sam shkor bad eksamin na ka bynta ka bit ka biang u paidbah.