Lah ban ai jingmut ka sorkar, ban pynjlan por ia ki MDC

Shillong, 23 Naitung:
Ka sorkar jylla ka lah ban ai jingmut ia u Lat ka jylla u Dr KK Paul ban pyn jlan ia ka por jinglong MDC jong ki lai tylli ki Autonomous District Councils (ADCs) ha kane ka jylla haduh ba kin pyndep ia ka jingphiah constityency.
Kane ka sorkar ka lah ban pyrkhat ban pyn jlan ia ka por jong ki ADC hadien ba la thaw ia ka Delimitation Commission ban bishar bniah ia ka jingphiah ia ki constituency jong ki Autonomous Districts Councils (ADCs).
“La don ka kyndon ha ka riti synshar ka ri kaba ai bor ha u Lat ban pynjlan ia ka por jong ki ADC” la ong ka thymmei khubor ha kane ka sngi Hatmajai.
Katkum ka jingong jong u heh sorkar, u Lat u dang eksamin mynta ia ka jingtyrwa ka sorkar ban thaw ia ka Delimitation Commission ban pynduh bad ban pynkha thymmai ia ki MDC constituency.
Ka khubor sorkar ka la ong rub ba ka sorkar ka elekshon MDC ban wan ha kane ka jylla, ka dei ban long da ki constituency thymmai.
Ka thymmei khubor, ka la kdew ruh ba ka elekshon jong ki ADC ban long la shem snem ha u Rymphang, lah ban pynslem lada ka sorkar ka rai ban pynlong ia ka elekshon da ki constituency thymmai.
Ha kajuh ka por, la iathuh ba ka sorkar ka la thaw ia ka Delimitation Commission hadien ba la mih ka jingpyrshah jur na ki paidbah bad ki seng sain pyrthei ia ia ka rukom phiah ia ki constituency khlem iaid katkum ki kyndon.
Kham mynshwa, ka KHADC Autonomous District (Constitution of District Councils) Rules, 2013 kaba thmu ban pynduh bad ban pynkha ia ki constituency, la pdiang da ka iing dorbar kaba dang shu dep shen.