Mih ka FTPGM ban kyntiew ia ki phlim

Shillong, 22 Naiwieng:
Ki nongshna phlim ka jylla ki la thaw ia ka Films Television Producers Guild Meghalaya (FTPGM) na ka bynta ban kyntiew ia ki kam pynmih phlim ha kane ka jylla.
Ka jingthmu jong kane ka long ban shim ia ki lad ki lynti ban ioh rejister ia ki kyrteng, ki khana, ki jingiathir, ki jingialang, ki workshop, ki tamasa phlim, ka jingshna phlim bad ki khusnam.
U Bah Pradip Kurbah u nongshna phlim ba paw ka jylla uba dei ruh u Chairman kane ka seng, u la ong ba la thaw ia kane ka kynhun da ka jingthmu ban iarap ban kyntiew ia ki nongshna phlim ha kane ka jylla namar ba ki don shibun ki jingeh.
U la ong ba ki nongshna phlim ha kane ka jylla kim pat tip ia ki kyndon ban ioh license ha ka jingshna phlim. “Nga la sngew ba donkam ban shim ia kane ka bynta ban iarap ia ki nongpynmih phlim bad lyngba kane, ngi lah ban pyrshang ban shna phlim kiba iadei katkum ki kyndon ka sorkar”,u la ong.
U la ong ba ki don ki phlim ba la shna ha kane ka jylla ki don jingeh namar ka jingiatyngkhuh ki kyrteng bad la iakren bad ka Eastern Indian Motion Picture Producers Association (EIMPPA) ban iarap ia ki ban lait na kane ka jingeh.