Thep kyrteng u kyrtong UDP, na Rambrai Jyrngam Constituency

Nongstoiñ, 21 Naiwieng:
U bah Morningstar Tympuin, u ba dei ruh u kyrtong ka seng United Democratic Party (UDP) u ban iakhun ia ka election shiteng samoi sha ka Khasi Hills Autonomous District Council (KHADC), na ka Rambrai Jyrngam Constituency, u la leit ban thep kyrteng mynta ka sngi ha khmat u Returning Officer ha Nongstoin.
Ha katei ka sngi la synrang lang ruh ia u bah M. Tympuin da ka kong Rona Khymdeit, kaba dei ka MDC ka Nongpoh, ki nongialam jong ka Party UDP na Nongstoin bad Rambrai ha ryngkat ki paidbah nongkyrshan jong u kiba la ia wan na Rambrai bad na ki thain Mawlangsu ban synran ia la u jong u kyrtong shaduh ka ophis jong u DC ka Nongstoin.
Kum ban shu pynkynmaw ba baroh ki kyrtong ki ban iakhun ia ka election shiteng samoi sha ka KHADC na Rambrai Jyrngam Constituency ki don haduh saw ngut kiba kynthup ia u bah Morningstar Tympuin kyrtong ka UDP, u bah K. Marbaniang kyrtong na ka seng Congress, u bah D. Pariong na ka BJP bad u samla World Champion Paliar na ka party HSPDP.
Nalor kitei ki kyrtong ki ban ia ai reng ha katei ka election ka ban sa long ha ka 13 tarik u Nohprah mynta u snem u bah M. Tympuin u dei ruh u kyrtong u ba nyngkong eh ban leit thep kyrteng lane file ia ka nomination paper ha khmat u Returning Officer.
Ha shwa ba u bah M. Tympuin un kiew sha ka ophis jong u DC ka West Khasi Hills, ban thep kyrteng ka la don ruh ka jingialang kaba lyngkot jong katei ka seng, ia kaba la pynlong hapoh Nongstoin, bad ha katei ka jingialang katei ka seng, ka la pynpaw ruh ba ka jingiakhun ha katei ka election kan long beit hapdeng ka party UDP pyrshah ia ka HSPDP. Shuh shuh ha katei ka jingialang na ka liang jong katei ka seng, ka la pynpaw ruh ia ka jingkyrmen kaba skhem ba u kyrtong u ba ka seng, ka la pynieng un ioh ruh ban khur ia ka jingjop ha katei ka election shiteng samoi.