T.1000 klur, mang ka Global University ban tei skul bah ha Tynring

Shillong, 23 Naitung:
Ka Techno Global Group (TGG) kaba dei na Kolkata ka la mang T. 1000 klur na ka bynta ban pynbiang ia ki jingdonkam jong kane ka skulbah ka Techno Global University (TGU) ban buh ha jylla Meghalaya.
“Ngi thmu ban bei haduh T.1000 klur ban tei ia ki jingdonkam jong kane ka skulbah ha kane ka jylla bad kane kan pynlong ia ka jinghikai kaba bit ha ka liang ka pule puthi, ka technology bad ka ioh kam ioh jam kong ki samla” la ong u national manager ka TGG u Prasanta Gangopa dhyay haba kren hynne sha ki lad pathai khubor ha Shillong bad la pynbna ruh ba ka jingpule ha ka lain engineering kan sdang mynta u snem 2013-2014.
Ia mynta kane ka skulbah ka dang treikam shipor na ka iing kaba don ha Shillong Polytechnic Campus ha Mawlai. U Gangopadhyay u la ong “Ngi la dep kam ia ka jaka ban buh ia kane ka skulbah ha Tynring. Ka jingheh ka long 56 akar bad yn rai shen ha kine ki bnai ban wan.
U Gangopadhyay u la kyrmen ba ka sorkar Meghalaya kan sa ai permi shon na ka bynta ban buh ia kane ka skulbah kloi katba lah khnang ba ka jingtei kan iaid shaid shaid.
Ym kum kiwei ki skulbah ha kane ka jylla, ka TGU ka la shim por haduh san snem ban sdang ia ka jingtreikam jongka da kaba plie ia ki jingpule hadien ba la pas ia ka bill ka university ha u snem 2008 ha iing dorbar thawain.
U Gangopadhyay u la ong, “ngim kwah ban shu tur kynsan kynsan hadien ba la pas ia ka Bill namar ba ngi kwah ban pynthikna ba baroh ki kyndon ba la pruid dak jong ka sorkar jylla bad ka University Grant Commission (UGC) la pyndep nadong shading.
Kane skulbah kan plie 720 tylli ki seat na ka bynta 6 tylli ki lain jingpule kynthup 120 seat kawei kawei ka lain jingpule. Ka jingpdiang kan sdang noh naduh ka 21 tarik haduh 24 tarik Naitung 2013.
Ki hynriew tylli ki jingpule ki long ka Electronic & Computer Engineering (ECE), Computer Science Engineering (CSE), Electrical Engineering (EE), Electrical & Electronic Engineering (EEE) bad ka Civil Engineering (CE).
Ka TGG ka don kumba 53 tylli ki jaka pule ha ka ri bad palat 55,000 ngut ki samla pule bad 4000 ngut ki nonghikai.