Kurup kyiad ka seng KSU Mawkhar na Motphran

Shillong, 22 Naitung:
Ka KSU Mawkhar pyllun ryngkat ba ka jingia treilang bad ka tnad Excise ka la ioh ban kurup kyiad na ki dukan ki ba die beain ha ki thain Motphran.
Ka Motphran ka dei ka ktem ki winestore bad ki restaurant ha kaba ka la don ka jingdie pathar beain ia ki kyiad bad ka KSU Mawkhar hadien ba la iatreilang bad ka tnad Excise ka East Khasi Hills ka la pynlong ia ka jingkhynra bad ioh kurup bun phew bilor ka kyiad phareng bad ka beer.
U Publicity secretary ka KSU Mawkhar u samla Newton Langstieh u la ong ba ka seng ka la pynlong ia ka jingkyndang ia ka jingdie kyiad baeain namar ba ki long ki ktem ba pynjot ia ki samla ka shnong bad kiwei kiwei namar ka jingiadih kyiad pathar.
U la ong ruh ba ka seng kan ym shong kli kti hynrei kan iai buddien ban pynlong ia ka jingkhynra naphang ban pynduh jait ia ka jingdie beain ia ka kyiad ha katei ka thain Motphran.