Shah kem ki nongleit buh pisa sha ATM

Shillong, 16 Naiwieng:
2 ngut ki nongrah pisa ban thep sha ATM ki la shah kem naba ki la pyndonkam bakla ia ka pisa ba ki rah ban leit thep sha ATM, katei ka pisa ka dei hadhu T.22 lak tyngka kaba la thmu ban thep ha ki ATM kiba don ha sor Tura, West Garo Hills.
La ujor ia katei ka jingjah pisa da u Debasish Mondal ka SIS Cash Service Pvt. Ltd ha ka 8, 9 bad 10 tarik mynta u bnai namarba u la lap ha ka por ba leh audit ba ka pisa kaba kot haduh T.22,06,800 ka la duna jingkheiñ. Ia kitei ki pisa ban leit thep sha ATM la aiti ha ki 2 ngut kiba la tip kyrteng kum u Amit Dalu bad u Rupon Das na Garo Hills.
Utei u ophisar jong ka SIS Cash Service Pvt. Ltd u la ong ba hadien ba la ujor FIR la kem ia kitei 2 ngut ha ka 12 tarik mynta u bnai bad ki pulit ki dang tohkit ia ka jingjia. “Ki dang don ha kti ki pulit bad dang pyrshang ban lap biang ia kitei ki pisa” u la ong. U la iathuh ruh ba la ai ia ki password ha kitei ar ngut bad la lap pynban ha ka por audit ba ka pisa ka jah.