Thaw komiti ka sorkar ban lum ia ka 2 percent na ki karkhana

Shillong, 15 Naiwieng:
Hapdeng ka jingkyrduh pisa, ka sorkar jylla ka la thaw da ka komiti na ka bynta ban lum thikna ia ka pisa na ki karkhana kiba don ha kane ka jylla lyngba ka bhah jongki kaba dei ia ka imlang sahlang ne ka Corporate Social Responsibility (CSR).
Kane ka bhah kaba ka sorkar ka la ioh na ki karkhana ka long 2 percent, kaba ki dei ban thep sha ka sorkar na ka bynta ban pyndonkam ha ki kam pynroi bad ki jingmyntoi jong ki paidbah.
U Myntri rangbah ka jylla u Dr Mukul Sangma u la lum ia ka jingialang bad ki heh ka tnad karkhana bad kiwei halor kane bad ka la rai ban thaw ia ka komiti ban peit bha ia kane ka jingoh khajna na ki karkhana kan wan beit sha ka pla ka sorkar katkum ka percent ba la buh.
“Ka Parliament ka la pass ia kane ka ain ha 2013 bad ka la treikam ha baroh ki karkhana naduh u snem 2014 ba ki karkhana ki dei ban mang 2 percent na ka jingioh nong jongki sha ka CSR”, la ong u Myntri Rangbah haba kren hadien ba la wai ka jingialang.
Katkum ka jingong u myntri rangbah ka sorkar kan thaw da ka tnad kaban peit ia kane khnang ban pynthikna ba kan nym lait ei, na ka bynta ban leh ia ki kam ban myntoi jong ki paidbah.
U la ong ba ia mynta ym pat tip katno ka sorkar kan iohlum na ki karkhana bad kan sa tip hadien ba la ioh lut ia ki jingkhein baroh.