Sdang ka jingialang ki heh shipai khappud ka India,Bangladesh

Shillong, 15 Naiwieng:
Ka jingialang ba 4 sngi hapdeng ki heh shipai khappud ka india bad Bangladesh ka la sdang mynta ka sngi hat majai ha Sylhet, Bangladesh bad katei ka jingialang kan kut ha ka 18 tarik mynta u bnai. Ki don 18 ngut ki heh shipai ka BSF kiba la leit sha katei ka jingialang bad ia kitei la ialam da u Shri P K Dubey, IG BSF, Meghalaya Ftr, la synranlang da u Shri Jai Bhagwan Sangwan, IG Tripura Ftr, Shri N S Jamwal, IG, Mizoram& Cachar Ftr bad kiwei pat ki heh shipai.
Ia ka kynhun na Banalgdesh la ialam da u Qazi Masroor Ullah, Additional Director General Region Comdr, North East Region, Sarail of Border Guard Bangladesh and Region Comdr, South East Region, Chittagong.
Ha ka sngi sdang jong katei ka jingialang la ia kren ia katto katne tylli ki mat kiba khang kongsan kum ka jingkynrei ki kam pyntriem ha khappud, ka jingryngkang pud bad kiwei pat kiba jia ha ki khappud ka jylla Assam, Meghalaya, Tripura bad Mizoram.
Yn ia kren ruh ha ka sngi kaba bud ia ka mat ka jingdon ki seng lehnoh ha khappud khamtam kiba ioh lad ban ryngkang pud sha Bangladesh. La ong ba ka la don ka jingiakren kaba ia sngewthuh jingmut bha hapdeng ki heh shipai India bad Bangladesh.