Dawa maramot, ba sniew palat ka surok Mawramhah-Mawthong

Mawkyrwat, 14 Naiwieng:
Ki paidbah jong ka thain Mawramhah, mawsep bad ka thain Mawthong, South West Khasi Hills District, Mawkyrwat ki la pynpaw ia ka jingsngewdiaw bad ud halor ka jingsniew palat ka surok PMGSY kaba sdang naduh Lad Laitlawsnai kaba iaid lyngba ka Pynden-mawramhah, Mawsep haduh Mawthong.
Na ka liang jong u Rangbah Shnong bah Khran Sohshang bad u bah Ferdinand Lyngkhoi Secretary jong ka shnong Pyndenmawramhah, ki la iathuh ba ka jingsniew jong kane ka surok ka long shaba palat pud kat haduh ba ki kali rit kim lah shuh ban iaid bad lada iaid ruh hap ban iaid lyngba ki thliew ki syar.
Ki la iathuh ruh ba kane ka surok ka dei kaba kongsan, namar kiba bun ki kali ki iaid lyngba kane ka surok, hynrei namar ka jingsniew palat ka surok ki paidbah ki la iakynduh jingeh khamtam ha ka por slap.
U Bah Ferdinand Lyngkhoi u la iathuh ba ki la leit iakynduh ia u SE PWD halor kane bad na ka liang jong u SE u la iathuh ba ym lah ban leh ei ei halor kane ka surok bad hap ban ap ia ka hokum na u Chief Engineer.
Na ka liang jong u bah Ferdinand u la kyntu ia ka tnad PWD ba kan maramot ia kane ka surok khnang ba ki kali ki lah ban iaid lyngba kane ka surok khamtam kan don ka jingiaseng Proseshon jong ka Balang Katholik jong ka Nongstoin Diocese ha Mawthong Parish ha ka 11 tarik jong u Nohprah, 2016.
Ha ka juh ka por na ka liang jong u bah Commander Shangpliang President jong ka Rilang People Development Council (RPDC) bad kumjuh ruh u samla jong katei ka thain u la dawa na ka tnad PWD ba kan maramot mardor ia kane ka surok khnang ban pynsuk ia ki paidbah ki ban leit sha ka Proseshon ka ban long ha Mawthong Parish bad kumjuh ruh ia ki paidbah kiba leit ba wan man ka sngi.