Palat 2hajar tuid ki paidbah ban ieng lain ha Bank ha Pynursla

Shillong, 13 Naiwieng:
Mynta ka sngi watla ka dei ka sngi u Blei hynrei ki paidbah ka thain Pynursla ki la iatuid ban thep bad kylliang pisa T. 500 bad T. 1000 ha baroh ki bank ba don ha Pynursla.
Ym duna ia ka ar hajar ngut ki paidbah kiba la ieng lain ban iakylliang pisa hynrei don ruh kiba la kut ka por treikam ki bank, kiba hap ban leit phai iing noh shwa.
Hynrei kaba kham sngew phylla ba la iohi ba bun ki dkhot ka Congress khamtam ki dkhot ka Youth Congress Pynursla ki iarap ia ki nongpyndap phom ia ki briew khamtam kito ki bym nang ban pyndap ia ki phom jongki.
Kine ki dkhot ka Congress ki la pyniarap ia ki paidbah ha man ki jaka shabar ki bank ba don ha Pynursla. Don kiba ong ba ki Congress ka thain Pynursla ki la pyni ia ka jingleh jong ka sorkar BJP jong u Narendra Modi kaba biang biang, wat la ki nongialam jongka, kum u Rahul Gandhi u ju wohnia ia kane ka jingleh jong u Myntri Rangbahduh ka ri.
Bun na ki paidbah khamtam ki bym nang ban thoh ban pule, kila ioh ia ka jingiarap na ki dkhot ka Congress kiba la don lypa ha katei ki jaka ban iarap ia ki briew ha kane ka por kaba ki donkam jingiarap, kiba la wanrah lut ia ki pisa jongki ba la buh na kyndong kynshrot kaba ki kamai ha ki snem ba la dep.
Lah ban kdew ba u Modi ha ka 8 tarik u la pynbna ba ki lut tyngka T. 1000 bad T. 500 kim long pisa shuh ha ka ri bad baroh ki paidbah ba don ia kine, ki dei ban leit bujli noh ha ki bank haduh ka 30 tarik Nohprah ban wan.
Ka jingpynduh ia kine ki lut tyngka ka long ban khang lad ia ka jingpyniad ia ki pisa tuh bad ban khang lad ia ki briew ba bamsap ba kynton pisa tuh ha iing jongki.