Niat u Lat sha ka sorkar, ha kaba phiah constituency ka KHADC

Shillong, 22 Naitung:
U Lat ka jylla u Dr Krishan Kant Paul, ha kane ka sngi Nyngkong u la niat sha ka sorkar jylla, ba kan eksamin ia ka jingbit jingbiang jong ka Bill ban phiah constituency jong ka KHADC kaba dang shu mynjur shen ha kane ka dorbar.
Ka dorbar jong ka KHADC ka la mynjur ia ka Khasi Hills Autonomous District (Constitution of District Council) (Amendment) Rules, 2013 kaba thmu ban phiah ia ki MDC constituency.
U Dr Paul u la pynthi kna ia kane ha ka jingiakynduh jong ki riew rangbah na ka thain Laitkroh constituency ba la ialam da u MDC u Bah Carmel Sohtun uba kyrpad ia u Lat ban sangeh ban ai jingmynjur ia katei ka Bill.
“U Lat u la pynthikna ba ka Bill yn sa eksamin da ka sorkar shwa ban poi ha kti jong u ban leh ia kaba khadduh” la ong u Bah Carmel ha ki nongthoh khubor hadien ba la iakynduh ia u Lat ha kane ka sngi Nyngkong.
Ka jingdawa ban bat shwa ia kane ka Bill ka la long hadien ba ka KHADC ka la rai ban pynduh noh ia ka Laitkroh bad ban pynkha thymmai ia ka Umsning constituency.
“Ngi la kyrpad ia ka sorkar ban pyrkhat bha ia kane ka Bill da kaba khot shwa ia ka jingbishar paidbah shwa ban iaid shakhmat ban shim ia ka rai ban pynduh ia ki constituency”, la ong u Bah Carmel.
U Bah Carmel u la pyrshah ia ka jingpas ia kane ka Bill bad u la dep kiew miej ha ka por ba long dorbar ka KHADC bad u la kyrhaw ruh ia ka Bill.
Katkum ka jingong u bah Carmel, ki shnong kiba hap ha ka Laitkroh ki la pynpaw ia ka jingpyrshah ia ka jingrai ka KHADC ban pynduh ia kane ka constityency bad ki la sngew ba ka jingleh ka dei kaba shu da ka bor khlem iaid katkum ka jingsngew bad ka jingrai jong ki paidbah.
Kane ka Bill jong ka KHADC ka la ioh ruh ia ka jingpyrshah jur na ki shnong ha ka thain West Khasi Hills kiba pyrshah ia ka jingpynhap sha kawei ka constituency sha kawei pat.