Jurip ba lynshop phria ha thain Mawkynrew

Shillong, 10 Naiwieng:
Ki nongialam jong ka Joint Action Committee of All Meghalaya Farmer Union (JACAM FU) kynthup ia u bah Commander Shangpliang uba dei u Chairman bad kumjuh ruh u bah Erick Syiemlieh Organising Secretary ki la leit jngoh ia ki lyngkha rep kiba la shah lynshop ha u phria ha ki thain Pingwait, Dienglieng bad kiwei ki shnong kiba hap hapoh ka
Mawkynrew Block.
Ha kane ka jingleit jurip ki jong kitei ki nongialam seng nongrep ha katei ka thain la lap ba u kba uba la soh bha satang ban ot noh u la hap lut. U kba uba la hap lut u symboh ki kynthup ia kiba la dep ot kiba la lum ha lyngkha bad kumjuh ruh ki bym pat ot bad kiba dang ieng ha ki lyngkha.
Na ka liang jong u bah Commander Shangpliang Chairman jong ka JACAMFU u la iathuh ba ki paidbah kane ka thain ki la iathuh ba u kba mynta u snem u long u ba bha, hynrei ka lehnohei lut namar ka jingwan lynsop jong u phria.
Haba kylli na ki paidbah ki la iathuh ba, ki nongtrei napoh block ki la bthah ban shondur bad leit rah sha ophis khnang ba yn lah ban phah sha ka sorkar na ka bynta ban ioh jingiarap. U bah Commander u la
iathuh ba ym tang u kba, hynrei u phan bad ki jhur ki la shah pynjurlor lut. Na ka liang jong u bah Commander u la iathuh ba u la ioh ban iakren bad u Gram Sevak jong ka Mawkynrew Block ha kaba u la kyrpad ban pynkhreh ia ka kaiphod kaba biang khnang ba ki paidbah kiba la shah duhnong kin ioh jingiarap.
Ha kawei pat ka liang u bah Commander Shangpliang u la kyntu ia ka sorkar ba kan pynkloi ia ka jingai jingiarap bad ka jingiap kam dei ban long kumba ai arsap kumba long ha ki snem kiba la dep ha kaba ki nongrep ki ioh tang mar T.170, hynrei ki dei ban ai jingiarap katkum ka jingjulor jong u kba, pan bad kiwei pat ki jhur.
Na ka liang jong u bah Erick Syiemlieh u la ong ba ka seng kan nym shong kli kti halor kane ka bynta, hynrei kan iai buddien ban iakren bad ki bor sorkar ban pynkloi bad kumjuh ruh ban ai ka jingiarap sha kitei ki lonot. Ha ka juh ka por u la kyntu ia ka sorkar ba kan pyllait noh ia ka pisa jingiarap sha ki paidbah kiba la shah ktah naduh u snem 2014.