Yn kynduh Lat ka KHADC bym thung Protem Chairman

Shillong, 10 Naiwieng:
Mynta ka sngi ka la don ka jingialang ki MDC ha KHADC bad ha katei ka jingialang ki la ia kren halor ka jingpynslem u Lat ban thungnoh ia u Protem chairman bad ban mynjur ia ka shithi risaiñ ki EM ka KHADC.
Haba kren sha ki nongthohkhubor u bah Pynshngaiñ N syiem u la ong ba ha ka taiew ban wan un leit ban ia kynduh ia u Lat ba pan jingshai halor katei ka jingpynslem bad katei ka jingiakren ka long ruh namar ka jingsah pongding ki Bill ka district Council ha ka tnad DCA ka sorkar jylla.
Ha kaba ia dei bad ka jingkynnoh u myntri rangbah ka jylla u Dr.Mukul Sangma ba u bah Pynshngaiñ u dei u nongshet kylla ia ka jaitbynriew, namar ba um pan biang ia ka VAB na ka MHA, u bah Pynshngaiñ u la ong ba ka KHADC ka la dep phah jingpynshai sha ka MHA halor katei ka Bill kumta ka Council ka kwah ban ioh jubab shuwa na ka MHA.
Ula ong ba dei kito kiba ai jingmut sha u Lat ban phah ia ka VAB sha ka MHA kiba shet kylla ia ka jaitbynriew bad ka dei ruh ka sien ba nyngkong ha ka khana jong ka District Council ba ia ka Bill ba la mynjur da ka ing dorbar yn phah sha ka MHA.