Ym tip ka EM ba ia kren Pastor U CEM, ia ka aiñ shongkha

Shillong,9 Naiwieng:
Mynhynnin ka sngi ki pastor ki la leit ban iakynduh ia u Chief Executive Member (CEM) ka KHADC u bah Pynshngain N Syiem na ka bynta ban ia kren halor ka aiñ shongkha shongman ba la pynbna da ka sorkar jylla ne ka Meghalaya Compulsory Registration of Marriage Act, 2012 bad Rules 2015, katei ka jingiakynduh jong ki ka long ban ia kren namar ba katei ka aiñ shongkha shongman ka sorkar ka ktah ia ka jingpyniathoh shongkurim ki balang Kristan.
Hadien ba la ioh jingtip ba ka la don ka jingialang hapdeng ki Pastor Kristan bad u CEM ryngkat kiwei pat ki EM ka KHADC, u Rupang u la ia kren da ka phone bad ka EM ba peit ia katei ka tnad Marriage and Divorce ka KHADC ka kong Grace Mary Kharpuri hynrei kaba lyngngoh ka long ba ka EM ka la ong ba kam don jingtip eiei shaphang katei ka jingialang hapdeng ki pastor bad ka KHADC wat la katei ka sobjek ka hap hapoh ka jingpeit jong ka. “Ym don ba pyntip eiei sha nga, ngam tip ba ka don kum kata ka jingialang” ang lyngngoh ka kong Grace haba ia kren bad u Rupang.
Ka kong Grace ka la iathuh ba kham mynshuwa ki Pastor ki la wan sha ka ban ia kren shaphang katei ka aiñ shongkha shongman hynrei kim shym la ai pat da ka jingthoh bad ka la iathuh ba ka la ong ha ki ba kin wanrah ha ka dur ka jingthoh khnang ba kan long ban ia kren, hynrei kim shym la wan mih shuh sha ka “Ngam tip ba ki la ia leit bad u CEM, ha ka jingshisha nga la dei ban ioh jingtip” ka la ong biang.
Katei ka jubab na ka EM jong ka KHADC ka la pynlong ia une u nongthohkhubor ban wad bniah shaphang ka saiñpyrthei ha KHADC bad la ioh jingtip ba don katto katne ngut ki MDC kiba don ha ka PDF ki bym sngewtynnad shuh ia u bah Pynshngaiñ, hynrei ki shong dohiap hapoh katei ka kynhun tad haduh ban da dep ka elekshon MDC shiteng samoi bad hadien ba la tip ia ka rem ka jop, ki lah ban mih noh na PDF bad ki lah ban ia thaw noh da ka kynhun ki seng trai ri ka ban ialam ia ka EC ba thymmai.