Mih ka jingiakhluit ki Pastor, na ka T.90lak ka KJPA sha MLCU

Shillong,21 Naitung:
Dang khyndiat sngi ki la mih ki kynrum kyn ram hapdeng ka MLCU bad ka KJP Assembly namar ka jingiakynnoh sah ram kaba T.90 lak tyngka ha kaba ki la mih ruh ki jing bym ia sngew thuh jingmut hapdeng ki Pastor, namar ka jingmih khubor shaphang ka Martin Luther Christian University bad ka KJP Assembly.
Halor kitei ki mat u Rupang u la ioh ban ia kren twad jingmut khyn diat na uwei na ki pastor rangbah jong ka KJP Assembly ha kaba u Rev.P.Hynniewta, u la ia thuh ba kumba la mih ha ki khubor ki long kiba shisha bad ki jingkren jong u Administrative Secretary Rev.N.S Phawa ki long katkum ki jingshisha ba ka MLCU kam don jingiadei eiei bad ka KJP Assembly, namar ba ka Assembly ka la pyndkut noh ka jing iadei bad ka MLCU, ha kaba u la ban biang ba ia katei ka jingkren jong u Pastor Phawa la pynskhem shuh shuh ha ka Executive Committee kaba la long ha ka 16 tarik mynta u bnai.
Hadien ba la ioh jingtip ba ki la don ki jingiakhluit hapdeng ki Pastor, namar ka jingmih khubor ha kine ki sngi shaphang ka jingiadei ka MLCU bad ka KJP Assembly; u Rupang u la kylli biang hato kane ka long mo kaba shisha ha kaba u pastor Hynniewta u la kubur ba ki jingiakhluit hi ki mih na ka jingkren jong u pastor Phawa ha ki nongthoh khubor. “ Kum u Pastor um lah ban set ia ki jingshisha khamtam haba ia kren bad ki nongthohkhubor” ong u Pastor Hynniewta uba la pynpaw ba kiei ki jingkren ba u pastor Phawa u la kren ka dei ka kamram jong u ban kren kum u Pastor, khamtam ha ki nongthoh khubor, namar ba u kren ruh ia ki jingshisha.
Shuh shuh u Pastor Hynniewta u la iathuh ba baroh ki la tip ba ka MLCU bad ka KJP Assembly kim don jingiadei shuh, hynrei ki don pat katto katne ngut ki pastor bad ki tymmen basan kiba kwah ban pynkylla ia ka rai jong ka Assembly ha kaba ki la pyrshang ban leit ia kren sha ki bor bahalor ban pynkylla ia katei ka rai. “ Ki don katto katne ngut ki pastor bad ki Tymmenbasan kiba kwah ban pynkylla ia ka rai jong ka Assembly, ki la pyrshang ruh ban leit ia kynduh ia ki bor bahalor ban pynkylla ia ka rai” pynkut u Rev.Hynniewta, uba dei U Pastor Incharge ka Lawbah da kaba ban biang sa shisien “Hynrei ka jingialang kaba la long ha ka 16 tarik ka la nang pynskhem shuh shuh ia katei ka rai”.