Bitar ka MPYC ba shah kem U Rahul, dawa hiar shuki ia U Modi

Shillong, 3 Naiwieng:
Ka Meghalaya Pradesh Youth Congress, ba la ialam da U Richard Marak, ka la pynlong ia ka jing ia lum lymbung mynta ka sngi, ha Congress Bhawan, Shillong bad ka daw ka long halor ka jingshah kem jong u Rahul Gandhi Vice President jong ka seng, ha ka por ba u leit jngoh ia u shipai ba pyniap ialade, U Subedar RK Grewal, uba pyniap ialade na ka daw jong ka jing bym ioh thikna ka bai bam tymmen, lane kaba ki ong One Rank One Pension.
Ha katei ka jing ia lum lymbung, la don lang U Bah James S.Lyngdoh, Working President, MPCC, ki General Secretary ka MPCC, ka kong Joplin Shylla, President Meghalaya Pradesh Mahila Congress bad kiwei de ki dkhot. Ka jingialum lymbung ka kren pyrshah jur halor katei ka jingkem ia U Rahul lem bad kiwei de ki dkhot jong ka AICC, ha ryngkat bad kiba ha iing jong utei u shipai uba iap.
Ki jingthoh pyrshah ha katei ka jing ia lum jong kitei ki samla Congress, ki kynthup “Ka India ka mad ia ka synshar thombor, kaba khlem iathuh briew bad phi sngew kumno ia ka sorkar kaba hukum ia ka jinglong jingman jong u riew paidbah”.
Ka MPYC, ka dawa ruh ba dei ban weng noh ia U Police Commissioner jong ka Delhi lane ba u dei ban hiar shuki mardor. Ka MPYC, ka dawa ba U Modi, uba la buh jingkular, na bynta ka jingsiew bai tymmen ia ki shipai lane ka OROP, ba un pynurlong ia ki jingkular jongu lane ba u dei ban hiar shuki noh.