Rai 4 hajar ki nonghikai ban pan jingshai na ka NIOS na Delhi

Shillong, 3 Naiwieng:
Ki nonghikai Diploma in Elementary Education (D.El.Ed) jong u 2013, kiba don kumba 4 hajar ngut ki la rai ban pan jingshai na ka bor pyniaid ka National Institute of Open Schooling (NIOS) kaba don ha Delhi halor ka jingslem jongka, ban pynbna ia ka result thymmai kaba ki la ialeh hadien ba la mih ka huri hura.
Kane ka rai la shim ha ka jingialang kaba long mynta ka sngi ha Khasi National Dorbar Hall hadien ba kane ka bor pyniaid ka la shu sngap wat hadien ba ki la dawa ba ka dei ban pynbna ia ka result thymmai, kaba la kular ruh da u Director ka NIOS Guwahati ban pynbna ia ka result thymmai ha ka 31 tarik Risaw.
Kine ki nonghikai ba dang shah hikai, ki la rai ban ai da ka dorkhas sha ka Kong Roshan Warjri ka myntri ka tnad Higher & Technical Education ha ka 7 tarik Naiwieng, ba kan tuklar ia kane ka kam.
“Ka la long 9 bnai naduh ba ngi la dawa hynrei kam shym la leh eiei kane ka bor ba dei peit bad kam don satia kano kano ka dak ba kin pynbna ia ka result thymmai bad kane kala buh ia ngi ha ka jingeh”, la ong u Bah JJ Lyngkhoi u Convenor D.El.Ed East Khasi Hills haba kren sha ki nongthoh khubor hynne ka sngi.
U la ong ba ki ophis ka NIOS ki la shu niat na kawei sha kawei pat. “Ka ophis Shillong ka kynnoh ia ka Guwahati bad na Guwahati ki kynnoh ia ka ophis ha Delhi bad namar kane, ngi la rai ban leit iakynduh noh dalade sha Delhi ha ka 15 tarik Naiwieng, ban pan jingshai”, la ong u Bah Lyngkhoi.
U la ong ba lada ka jingleit sha Delhi kan nym pynhun, kim banse ban mih madan noh ban iakhih ha surok.
U la kynnoh ba ki don shibun ki jngdkoh ha ka jingpyniaid ka NIOS. “Ki don ki nonghikai kiba ioh mark palat ia kaba dei, bad kiba khlem ialeh ruh ki pas bad ki code ruh ki bakla”, u la ong bad bynrap ba lada ka treikam ha kane ka rukom, kim banse ban shu pynsangeh noh ia ka jingtreikam ka NIOS ha Laitumkhrah.
Ha kane ka jingialang la wan ban iashim bynta lang ki nonghikai na East Khasi Hills, Ri Bhoi, West bad South West District, Jaintia Hills lem ka jingdonlang ki nongkitkam ka Meghalaya SSA School Association (MSSASA).