Kwah long Scheduled Tribe ki Gorkha

Shillong, 3 Naiwieng:
U Jual Oram, myntri jong ka sorkar India, uba peit ia ka bha ka miat jong ki rit paid (Tribal), ula ong ba ka don ka komiti jong ka sorkar India, kaba la thung, na ka bynta ban rai, la ki Gorkha bad ki hynriew jait ki rit paid ha Assam, ki hap ne em, ha ki kyndon Scheduled Tribe.
“Ngi dang ap ia ka kaiphod bad ka dang don ha ka jingpynkhreh, hynrei ngi tip ba ka sorkar India, ka dang pule ia ki mat jingdawa na ki kynhun bapher” ong U Oram haba kren ha ki kotkhubor mynta ka sngi.
U myntri jong ka sorkar India, u wan ban shim bynta ha ka jingialang, ba la pynbeit da ka Synod College, Shillong, ha ka jing ia treilang bad ka PA Sangma Foundation.
Na ka liang jong ka tnat kam poh iing, ka dang peit bniah ia kane ka phang, ha kaba la khlieh da U Joint Secretery jong katei ka tnat.
La sngewthuh ba katei ka komiti, kan hap ban ai ia ka kaiphod jongka, hapoh lai bnai. U Oram, u iathuh ba ka kamram jongu, kum u myntri ba peit ia ki Tribal, ula pynwandur ia ki 270 tylli ki kynhun rit paid ha ka India bad la weng noh ia shiphew tylli na kitei bad 260tylli na kitei, la ailad ba kin pynbeit ia ki kyntien ba ki kren bad ki kyntien thoh jongki ruh.
U myntri, ha ka jingkren ha katei ka jingialang, u ong ba ki don kumba 27tylli ki ktien jong ki rit paid ha ka Ri, ki ban sa duh jait noh bad ka sorkar India, ka sngewkhia bha ia kane, ong U Oram.