Shah kem 3 ngut ba donkti pyniap ha Umlyngka

Shillong, 21 Naitung:
Lai ngut ki runar kiba donkti ban rahbor bad pyniap dusmon ia u Bah Coniwell Thabah, u Trai jong kawei ka kar khana siat rong kali ba don ha Mawlai Nongpdeng, ki la shah kem ha kane ka sngi Saitjain.
Ki lai ngut ki runar ba shah kem ba la tip kyrteng kum u Kynsai Jones Kharlukhi ba 25 snem, u Shanbor Rani ba 23 snem, bad u Markstar Pariat ki ba dei hi na Mawlai bad kiba ia ithuh ithaw bha bad u Bah Coniwell. Ia u Kynsai Jone bad u Shanbor Rani, la ioh kem na Shillong katba ia u Markstar Pariat la ioh kem na Laitryngew.
Ki Pulit ki iathuh ba kine ki lai ngut kila rahbor ia u Bah Coniwell ban lute bad kila phah soi jubor ia lai tylli ki cheque ba T. 3.50 lak, T. 3 lak bad T. 2 lak tyngka hashuwa ba kin pyniap ia u. Kine ki runar kila leit sha kawei ka Bank hangne ha nongbah ban leit sei ia kane ka cheque hynrei ka Bank kala kyntait ban pdiang ia ka.
Ki pulit ki iathuh ba ha kane ka jingleit jong ki sha Bank, ki CCTV jong ka Bank kila ioh ban ring video ia ka durkhmat jong kine ki runar bad na kane ka Video CCTV, la pynsuk ia ki Pulit ban thwet bad ban kem ia kine ki lai ngut.
Ban pynkynmaw u Bah Coniwell Thabah ula jah rngai bad ka kali Maruti Car, naduh ka janmiet 12 tarik na ki thaiñ Motphran hynrei ia ka kali la lap ha ka 16 tarik napoh ka surok Lummawbah. Hynrei shisngi hadien kane, ki Pulit kila lap noh ia ka metiap kaba la thiah lyngktar hapoh ka khlaw najan ki thaiñ Umlyngka.
Ki Pulit ki iathuh ba u Shanbor Rani u dei u snar bala shah kem haduh arsien kynthih ha ki Pulit halor ka jingdonkti ban thang ia ka kali ha Mawlai bad ka jingshoh ia uwei u Pulit Traffic ha Mawlai Petrol Pump.