Halor ka jaka talasi mynder, pynbeit bad ki nongsynshar Raid: RBYF

Nongpoh, 31 Risaw:
Kum ka jingkyrshan ia ka jingkyrpad kaba la buh da ki khlieh nong-synshar ka Hima 12 Lyngdoh Nongpoh Sir-darship Elaka bad ka Raid Nongkyrla ha Ri Bhoi District, kiba la pynpaw ia ka jingpyrshah halor ka jingleh donbor ka sorkar haba iadei bad ka jingthmu ban shna ia ka jaka talasi mynder ha 19Mer, mynta ka sngi ka Ri Bhoi Youth Federation (RBYF), Sengkmie, ka la phah syndon da ka jingthoh sha u Deputy Commissioner ka Ri Bhoi, na ka bynta ban wad ia ka jingshisha halor katei ka jaka.
Kumban shu pynkynmaw hangne, ka sorkar jylla ka la don ia ka jingthmu ban shna ia ka jaka talasi mynder, ha katei ka jaka kaba don ha 19 mile, kaba hap ruh hapoh ka jingpeit jingkhmieh ka Hima 12 Lyngdoh, Nongpoh Sirdarship Elaka and Raid Nongkyrla, hynrei ka daw kaba la pynlong ban mih katei ka jingpyrshah ka dei halor ka nongrim ba ka sorkar kam shem la pan kano kano ka jingbit ne NOC na ki nongshynshar, kaba long ruh kum ka jingpynkhein ia ka Riti Dustur ka rukom bat khyndew ha ka jylla.
Kumba la mih ka jingpyrshah da ki nongsynshar Raid bad Hima, ka RBYF ruh ka la pynpaw ia ka jingkyndit bad sngewlyngoh ba kumno ka sorkar kaba tip khambha ia ka rukom bat khyndew ha ka jylla, hynrei ka leh lyndet pynban khlem da pyntip sha ki nongialam ka Raid bad Hima, kaba lon ruh kum ka jingiuhroit ia ka rukom synshar khaddar u khun Khasi Khara ia kaba la buh naduh mynshwa.
Ha kajuh ka por, ka RBYF ka la pynpaw ruh ia ka jingsngewlyngoh halor ka jingthmu ka sorkar ba shim ia katei ka jaka kaba don ha 19Mer, namar ba katkum ka hukum jong section 4(2) ha ka Right to Fair Compensation and Transparency in Land acquisition, Rehabilitation and resettlement Act, 2013 ba la pynmih ha ka the Meghalaya Gazette ha ka 12.02.2016, namar kat haduh mynta kitei ki nongsynshar Raid bad Hima kim pat ioh jingtip ei ei halor katei ka jingthmu ka sorkar.
Ha kane ka jingthoh kaba la phah sha u DC ka Ri Bhoi, ka RBYF ka la kyrpad ia ka sorkar ba ka dei ban pynsangeh noh shwa ia katei ka jingthmu ban shna ia katei ka Entry & Exit bad tad haduh ban da ioh ban iakren bad ia pynbeit shwa bad ki nongshynshar ka Raid bad Hima, khnang ba kan poi sha ka jingbeit jingryntih lang na baroh arliang.