Shah bat ilektrik: Iap ka kmie bad 6 ngut ki khun ha Nongthymmai, Lyngiong

Shillong, 27 Risaw:
U lyoh ba dum u la wan tap kyndit kyndit ha kawei ka longing mynta ka sngi ha kaba tang hapdeng ki khyndiat minit 7 ngut ki mynsiem briew ki la duh ei. Katei ka jingjia ka la jia mynta ka sngi ka 27 tarik u risaw ha ka shnong Nongthymmai-Neng, Lyngiong ka shnong kaba hap ban iaid lynti ban leit sha Tyrsad. Ka jingjia ka la jia ha ka por 2 baje nohphai sngi.
Ki 7 ngut kiba la iap na kajuh katei ka ing ki dei ka kmie kaba la tip kyrteng kum ka kong Trisdalin Shangpliang kaba don hapdeng ka 45 haduh 50 snem karta, nangta ki khun rit jong ka kiba la tip kyrteng kum u Kamurstar Shangpliang (9 snem karta), ka Sngewbhalang Shangpliang (6 snem karta), u Beddingstar Shangpliang (5 snem karta),ka Shishalin Shangpliang ( 2 snem shiteng karta), u khyllung ba dang 7 bnai u bym pat shym la buh kyrteng bad iwei pat i dei iba dang don ha kpoh ka kmie kaba dang armet i dang don 4 bnai.
Ha ka por ba jia katei ka jingjia u kpa jong kitei ki khynnah uba la tip kyrteng kum u Tirot Sing Khyriem um don ha ing,hynrei u don sha Lyngkha ryngkat bad 6 ngut ki khun heh jong u. Ka kong Trisdalin bad u bah Tirotsing ki don 11 ngut kikhun bad haba kheinlang bad iba hakpoh ki long 12 ngut.
Katkum ka khubor ba la iohlum na ki pulit la iathuh ba ha ka por ba jia katei ka jingjia ka dei ruh ka por ba u slap u la sdang rang, hynrei kyndit ka don ka jingthud ka bor ding ilektrik bad ka don ka jingkynshait ding ha ka jaka ba buh meter bad ha katei ka por kitei ki briew kiba don hapoh ing ki la mih shabar.
Shabar jong katei ka ing tin kaba ki shong ka jaka ka dang jhieh naba dang shu hap slap bad dei hangtei ba ka nbording ilektrik ka la lympat ia kitei baroh shiing haduh ba kin da iap hashen,la ong ba ym don ba iohi ia katei ka jingjia hynrei ki kyndit ban lappynban ia ki metiap kiba thiah lyngktar shabar jong ka ing.
Tang mar ia ioh jingtip ia katei ka jingjia ki pulit ryngkat ki majistor ki la hiar sha katei ka shnong bad la pyllait noh na ka post mortem kumba la kyrpad da kiba haing.
Katkum ki dak kiba paw ha ka met jong kitei kiba iap la iohi ba ka don ka jinging ding ha ki bynta bapher ka met jong ki ,don kiba ing na bynta ki kjat, durkhmat.Ia ka metiap jong ki yn pynkhuid lashai ka sngi.
La iathuh ba ha katei ka por ba jia katei ka jingjia , ka ding ilektrik ka la pur ym tang ha katei ka ing hynrei ka la jia ruh ha kiwei pat ki ing hynrei kam shym la don kano kano ka jingjia ba sngewsih ha kiwei pat ki ing.