“U Lat un hap thung Protem Chairman, da uwei na ki MDC”

Shillong, 26 Risaw:
Hadien ka jingrisaiñ noh u Chairman bad Deputy Chairman ka KHADC, ka la mih ka jingiakren mano ban pyniaid ia ki kam ka ing dorbar ka KHADC. U Rupang u la twad jingmut na ki chairman barim ka KHADC kiba la shong teng ha katei ka shuki aiu kan jia ia ki kam ka ing dorbar haba ym don nongpeit shuh.
Ka kong Teilinia Thangkhiew,Chairperson barim ka la ong ba haba ym don Chairman bad Dy.Chairman shuh baroh ka shong ha u Lat ka jylla, bad ka la ong ba ym don ba lah ban khot dorbar dano dano ruh lait na u Lat ka jylla, hynrei shipor ar por ia ki kam ka ing dorbar hap ban peit da u Secretary jong ka Legislative. U bah Martamlin Pyrbot u la ong ba kumba ju long haba risaiñ u Chairman u don u Deputy Chairman bad ia ka shithi risaiñ u hap ban ai sha u Dy.Chairman bad kumjuh ruh haba risaiñ u Dy.Chairman u hap ban ai sha u chairman hynrei ha kane ka jingjia kaba jia mynta ba baroh ngut ki risaiñ ki hap ban phah ia ka shithi risaiñ jong ki sha u Lat ka jylla.
U la ong ba hadien katei u Lat un sa thung Protem Chairman da uwei napdeng ki MDC uba u sngewbit bad utei u Protem Chairman un peit shipor ia ki kam ki jam ka ing dorbar haduh ban da lah ban pynlong dorbar kyrpang ban jied Chairman.
U la ong ba haba jia kumtei ka Executive Committee ka hap ban kyntur wut wut sha u Lat lyngba ka sorkar jylla ban pyntip ia katei ka jingjia,haba kylli hato ka Executive Committee ka lah ne-em ban leit sha u Lat khlem da iaid lyngba ka sorkar jylla, u bah Martamlin u la ong ba kumba la ju leh ha ki por ba la dep la ju iaid lyngba ka sorkar jylla.