Bun ki Sengbhalang, ki MDC kiba kyrshan

Jowai, 25 Risaw:
Mynta ka sngi, ka Meghalaya State Pollution Control Board (MSPCB) ka la pynlong ia ka jingpynsngew paidbah halor ka jingpan jingbit ka Ms. Adhunik Cement Ltd kaba don ha Thangskai ban tih mawshun na ka par kaba la ka dep thied kaba heh haduh 4.90 Hectare kaba don ha Umsoo-Motang, Thangskai.
Ia kane ka jingpyn-sngew paidbah la pyniaid da u ADC ka East Jaintia Hills, u bah LK Nongbri ha ka jingiadonlang u ADC SS Syiemlieh bad u Asst. Engineer ka MSPCB, u  bah S. Syiem.
Na ka liang ki heh company ki la pynshai sha ki paidbah halor ki kam pynroi ba la leh bad ki ba yn sa pyndep na ka bynta ka bha ka miat ka mariang ha katei ka thain bad ruh ka la batai shaphang ka rukom tih ia u Mawshun kaba ym don jingktah ia ka um bam um dih lane ia ka lyer bad wat ia ki mrad ki mreng.
Ha katei ka jingpynsngew paidbah ki la don haduh 105 ngut kiba la wan buh kyrteng ban ai jingkren hynrei tang 71 ki la ai jingkren katba kiba sah ki jahrngai noh.
Napdeng ki 71 ngut kiba la kren, 12 ngut kiba dei ki nongialam ba la mih khmat na ki seng bapher bapher kynthup ia ka FKJGP, KSU Narpuh Circle, NEIPF bad kiwei kiwei.
Kitei ki 12 ngut ki nongialam sengbhalang ki la ieng skhem ban pyrshah ia katei ka jingthmu jong ka Company halor ka nongrim ba kane ka jingkhlong ne tih mawshuh kan ktah ia ka mariang.
Shuh shuh ki don haduh 51 tylli ki shithi kiba la ioh pdiang da ka MSPCB kiba la thoh da kiba bun tylli ki sengbhalang ban ai ka jingkyrshan ia katei ka company. Nalor ki sengbhalang ki la don ruh ki shithi ba la thoh da ki MDC bad ex- MDC.
Napdeng ki 51 tylli ki shithi, tang 4 tylli kiba pyrshah ia katei ka jingthmu jong katei ka Company pynmih dewbilat ha Narpuh Elaka.
Ka KSU Narpuh Circle ba la ai jingkren da u samla  Chaprang Pynkhlong, President KSU Narpuh Circle u la ong ba ha ki jaka ban ai bus skul ban buh skul ia ki khynnah pule na Lumshnong sha Khliehriat, ka Company ka ladei ban thaw da ka skul kaba bha ha katei ka thain.
Kawei na ka nongshong shnong ka thain, ka kong Rinaroi Bareh ka la kyntu ia ki paidbah ba ha skul ki nonghikai ki la ju hikai, ban iada ia ka mariang hynrei kaba lyngngoh pat ba bun ki nonghikai hangne ki la pynshlur pynban ia ki paidbah ban pynjot ia ka mariang.