Ka dor shna iing bun mala, ka long tang 40naia shi sq.ft

Shillong, 25 Risaw:
Ka Synjuk ki nongsynshar Shnong ka thaiñ Upper Shillong mynta ka sngi ki la leit ia kynduh ia u myntri ka tnad pynroi sor u ba R.V.Lyngdoh uba dei ruh u MLA katei ka thaiñ bad katei ka jingiakynduh jong ki ka dei halor ka jingkyntur pud ka MUDA sha ki thaiñ Upper Shillong kaba kim pat da ioh jingshai bha haduh kine ki sngi.
U bah Gilbert Laloo General Secretary katei ka Synjuk, haba ia kren bad ki nongthohkhubor u la ong ba ki khlieh nongsynshar na ka thaiñ Upper Shillong ki kwah ban pan jingshai na u myntri ka tnad pynroi sor halor ka jingkyntur pud ka MUDA sha ki shnong kiba hap shabar ka Shillong Municipal board ban pyntreikam ia ka aiñ shna ing ba la tip kum ka Meghalaya Building Bye Law 2011.
Ha katei ka jingiakynduh jong ki, u bah Gilbert u la ong ba ka thaiñ Upper Shillong da lei lei ruh kan ym hap hapoh ka jaka Municipal hynrei la pynngat pat katto katne tylli ki shnong hapoh ka Master Plan Areas. U bah Gilbert u la ong ruh ba u myntri u la pyntip sha ki ba ki paidbah kim donkam ia ka Occupancy Certificate na ka MUDA haba ki shna ia ki ingrim (Assam type) hynrei tang haba ki shna ia ki ingmaw bun mala ki G+3 ki donkam ban siew bad ka jingsiew ka long ha ka dor barit kaba tang 40 naia shi sq ft.
Halor ka jingud ki Rangbah Shnong ba ka MUDA ka pan pisa kaba heh ban ioh ia ka Occupancy Certificate, u Bah Gilbert u la ong ba u bah Ronnie u la ong ia ki ba ki heh ka MUDA ki tip ia ki aiñ ne ki kyndon tangba kim pyntreikam katkum ka kyndon. Ula ong ba ka sorkar kan shong jingialang ban ym ailad ba ki paidbah ka thaiñ Upper Shillong kin ngat ha ka jingsiew kaba heh. Ia ka khajna kaba 1% pat kaba dei na bynta ki shnong kiba ha ka Municipal u bah Laloo u la ong ba ba u myntri u la pynshai ba ia katei ka khajna ki dei ki kontraktor kiba pynshna ing ki ban hap siew.
U Myntri u la pynshai ruh ba kam don satia kano kano ka jingkyntur pud jong ka MUDA sha ki shnong kiba don shabar u pud u sam ka Municipal namar ba ka dei ka kamram jong ka Khasi Hills Autonomous District Council (KHADC) ban kan thaw ia ka Agency ban peit ia u pud u sam jong ka. “Hynrei haduh mynta ka District Council kam shym pat shna kano kano ka Agency na bynta ban peit ia u pud u sam jong ka,” la ong u bah Laloo.