Ki phet seng ba ki kwah leh sngewbha, ong ka heh Congress

Shillong, 24 Risaw:
Ka MP ka Rajya Sabha ka Congress na Andhra Pradesh ka Renuka Chowdhury ka la ong ba ka jingphet seng jong ki briew na ka party Congress ka dei namar ba ki kwah ban leit sha ka party kaba don ha ka bor ban leh sngewbha.
Haba kren mynta ka sngi sha ki lad pathai khubor halor ka jingwan jngoh ia ka jylla kum ka chairperson ka Parliament Standing Committee ba peit ia ka mariang, ka saian bad teknoloji, ka la ong ba ka jingphet jong ki briew sha ka BJP da kaba kdew kti ia ki nongialam ka Congress kum u Rahul Gandhi ka dei tang namar ba ki kwah ban ai daw.
“Ki briew ki kwah ban kylla hadien ba la ioh leh kmen bad kaba suk ban kynnoh ia ki nongialam tang ban ioh daw hynrei ka dei ka jingshet kylla. Lada don ka jingeh, ki dei ban iakren ha ka party ban iapynbeit”, ka la ong.
Ka la kam ba ka jinglong nongialam ka party ka long kaba khlain bad kan nym shah jem haba don ka jingshah kynthah.
Lah ban kdew ba ki nongialam ka Congress ki la phet krad sha kawei pat ka party hadien ba ka BJP ka la wan ha ka bor ha sorkar pdeng kaba kynthup wat ka jinghuri hura ha kane ka jylla hapoh kane ka party. Kumba long mynta ka Congress ha kane ka jylla bad ha kiwei, ka la kynduh jingeh bha hadien ba bun ki nongialam ki la phet krad sha kiwei ki seng naduh ba la wan ka BJP ha ka bor ha Delhi.
Watla kam pat jia kaba heh kum sha kiwei ki jylla, hynrei ka jingphet seng ki san ngut ki MDC ha kane ka jylla,ka la pynduh nong jur ia ka Congress kaba
synshar ha kane ka jylla bun snem.