2 ki khyrdop; lum khajna ka KHADC ia ki nongkhaii trai shnong

Nongpoh, 24 Risaw:
Wat la ka Khasi Hills Autonomous District Council (KHADC), ka buh ia ka jaka khrong khajna ne Toll Gate, ha Baridua, Ri Bhoi District, ka long ban teh lakam tang ia ki nongkhaii bar jylla ki bym don ia ka Trading License, katba na ka liang ki nongialam shnong ka Baridua, ki la pynpaw ia ka jingpyrshah da kaba kynnoh ba katei ka jaka khrong khajna kaba la buh da ka KHADC, ka shim khajna wat ia ki trai ri trai muluk.
Kane ka la paw pyrthei mynta ka sngi, ha kaba ki nongialam shnong ka Baridua, ba kynthup ia u Bah Ioanis Narleng, rangbah shnong ka Baridua, ha ryngkat u Bah John Nongrum, Secretary Shnong lem bad ki katto katne ngut ki dkhot ka Dorbar Shnong, ki la leit ban jurip ia ki ar-tylli ki jaka khrong khajna kaba la buh da ka KHADC ha katei ka shnong.
Haba kren sha ki Nongthohkhubor, u Bah Ioanis Narleng, Rangbah Shnong ka Baridua, u la ong, ba ka shnong hi ka pyrshah halor kane ka jingwan buh Toll Gate ka KHADC bad ha ka jingshisha shwa ba kan buh ia kitei ki khyrdop lum khajna, ka la dei ban pyntip sha ka Dorbar Shnong, namar katei ka jaka kaba la buh ia kitei ki jaka khrong khajna ki dang hap hapoh u pud u sam ka shnong Baridua.
U la ong ruh, ba ka KHADC ka buh ia kitei ki Toll Gate khlem ka NOC ne ioh jingbit na ka shnong bad haba ka shnong kam don jingtip ei ei halor kitei ki jaka khrong khajna, mano pat ban bahkhlieh lada jia ba mih kino kino ki jingkulmar, la bynrap u Bah Ioanis Narleng.
“Hooid, ngi tip ba ka KHADC ka buh ia kane ka jaka khrong khajna, ka long ban khanglad ia ki Nongkhaii bar jylla (Non-Tribal), ki bym don Trading License kiba wan ban kit ia ki Shyiap, Maw, Khyndew bad kiwei kiwei, na ka bynta ban shalan sha ka jylla Assam, hynrei ngi dap pat da ka jingsngewkhia ban tip ba kane ka jaka khrong khajna kam mab wat ia ki nongkhaii kiba dei ki trai shnong, da kaba shim haduh T. 200 (Ar spah) kawei kali kum ka bai khajna” ong u Bah Ioanis Narleng.
Namarkata, haba iadei bad kitei ki jaka khyrdop lum khajna, na ka liang ka Dorbar Shnong, ka la dep ruh ban phah da ka jingthoh sha u DC ka Ri Bhoi, hynrei kat haduh mynta ym la leh ei ei, u la bynrap.